Pothuajse çdo ditë në Policinë e Kosovës raportohen raste të dhunës në familje, ku kryesisht viktima janë gratë që pësojnë nga bashkëshortët e tyre, të cilët nuk i denoncojnë shumë herë për shkak të frikës. Një rast i tillë ka ndodhur edhe në fshatin Janjevë të Lipjanit, dje në orët e pasdites, raporton Gazeta Sinjali.
Sinjali mëson se një grua e ka raportuar bashkëshortin e saj V.T., (41-vjeçar) në Polici për presionin që po ia shkakton asaj në vazhdimësi. Rasti i fundit, sipas saj ka ndodhur dje, kur pas një mosmarrëveshje mes tyre, burri kishte tentuar ta sulmojë fizikisht, por ajo kishte arritur të largohej nga shtëpia.
Përballë kësaj situate, gruaja ka vendosur që zgjidhja më e mirë është që të kërkohet ndihmë nga Policia, duke e denoncuar bashkëshortin e saj për dhunën që ia ka shkaktuar.
Ndaj të dyshuarit, Prokuroria ka nisur hetimet për veprën penale “dhunë në familje”.