Lëvizja Vetëvendosje, Aleanca për Ardhmërinë e Kosovës dhe Nisma Socialdemokrate nuk kanë bërë rirenditjen e emrave të kandidatëve në listat votues në zgjedhjet e parakohshme të 14 shkurti. Ndërsa, Partia Demokratike e Ashkalinjve të Kosovës ka bërë rirenditjen e kandidatëve.
Komisioni Qendror i Zgjedhjeve iu kishte dhënë mundësi partive politike që deri në orën 16:00 të njoftojnë për ri-renditjen e kandidatëve për deputetë.
Yll Buleshkaj nga Zyra për Regjistrim të Partive Politike dhe Certifikim, tregoi për ecurinë e këtij procesi.
Ai ka thënë se në numrat në broshura, ku mungojnë emrat e kandidatëve, do të hijezohen për të mos lejuar gabime nga qytetarët.
“Në rast se listat dhe kandidat e subjekteve politike me minus kandidat ku ka numra rendor por mungojnë emrat e kandidatëve ato hapësira në broshurat e kandidatëve dhe në formularin e listës do të hijezohen, shënohen për të evituar ngatërrimin e votave të kandidatëve. Në orën 16:00 pas këtij njoftimi kemi pranuar njoftim nga katër subjekte politika të cilat kanë treguar se do i mbajnë listat e kandidatëve ashtu siç kanë qenë në fillim. Si në vijim Lëvizja Vetëvendosje, Nisma, PDAK dhe AAK. Një subjekt politik ka dërguar një listë të riradhitur PAI dhe një subjekt politik nuk ka kthyer fare përgjigje, LDS”, tha Buleshkaj.
Kurse, Arianit Elshani nga PDK, anëtar i KQZ-së, tha se nëse në listat garuese lihen hapësira do të krijohen probleme në numërimin e votave por edhe tek vetë votuesit. Prandaj, ai u shpreh kundër këtij rekomandimi.
“Neni 27 përcakton qartë që duhet të jenë në forma grupore nga tre jo obligon edhe rirenditjen e listës , një shembull prej një subjekti politik ku janë larguar kandidatët kemi pesë burra rresht në listë të kandidatëve që bie në kundërshtim me nenin 27, bie në kundërshtim me ligjin për zgjedhjet e përgjithshme. Tjetra çështja e broshurave kërkoj që të largohet nga rekomandimi i sotëm që e kemi para vetës sepse është çështje KOZ-it dhe DOZ-it si departament. Lidhur me rirenditjen afati kohor u është dhënë deri në ora 16:00 pra deri sot iu është dhënë afat kohor për rirenditjen e atyre listave një subjekt politik ka bërë rirenditjen e saj….Përveç që ka me krijuar një huti të madhe tek votuesit, hutia tjetër ka me qenë edhe tek komisionerët, ka me qenë huti tek numëruesit e votave në QNR kështu vetëm do krijojmë probleme me këtë rekomandim me këto lista që janë prandaj si të tillë këtë rekomandim nuk e mbështes deri në rirenditjen ”, tha Elshani
E pas kësaj, anëtari i Lëvizjes Vetëvendosje në Komisionin Qendror të Zgjedhjeve, Sami Kurteshi tha se subjekti i tij nuk e ka ndërmend ta ndryshojë radhitjen e listës.
“Lëvizja Vetëvendosje ka vendosur që mos ta ndryshoj radhitjen në listë dhe çfarëdo tendence tjetër është e kundërligjshme, ne nuk e kemi ndryshuar dhe nuk e kemi ndërmend me ndryshua dhe nuk e kemi ndërmend me ndal betejën juridike lidhje me këtë çështje kjo ka marr fund. A ka tendenca për manipulim ajo është çështje tjetër dhe organeve që janë kompetente për këtë“, tha Kurteshi.
Alim Rama i Lëvizjes Vetëvendosje deklarimin e anëtarit të PDK-së e ka cilësuar si “tentim për të hutuar votuesit”.
Sami Hamiti nga LDK ,anëtar në KQZ-së, tha se mosrirenditja e listave të partive politike do shkaktojë telashe në procesin zgjedhor, prandaj ai kërkoi që më shumë të punohet për informim të qytetarëve.
“Për t’u rirenditur do ishte më së mirë për procesin zgjedhor e kuptoj atë punë sepse jemi në një situatë të parën por duhet që sekretarit të punoj shumë me informimin publik tash me trupat zgjedhore sepse ato që tha Arianti sigurisht që do ketë probleme në vendvotime do ketë dhe duhet të punohet gjatë dhe tu shpjegohet gjatë trajnimit se vendet e zbrazëta duhet të shikohen sepse kemi një situatë të re”, theksoi ai.
Kryetarja e Komisionit Qendror të Zgjedhjeve, Valdete Daka deklaroi se pas vendimit të Gjykatës Supreme nuk ka nevojë të votohet për certifikim, pasi që këta kandidat tashmë janë të certifikuar.
“Ato lista tashmë edhe nëse renditen ndoshta nuk munden me përmbush përsëri kuotën dhe i bie që ne nuk mund të ndërhyjmë, gjithsesi na tashmë e kemi një rekomandim nga Zyra dhe praktikisht ne nuk kemi çka të votojmë e kemi vetëm çështjen e kryer sa I përket certifkimit, I kemi kandidatët e certifikuar të kthyer në lista dhe nuk na bie të votojmë ne vetëm obligohemi me zbatuar vendimin e Gjykatës Supreme”, tha Daka.
Kryeshef i sekretariatit të KQZ-së, Burim Ahmetaj, ka thënë se nga baza aktuale e të dhënave janë 178,026 aplikues nga jashtë vendit, ndërsa vlerësimi i zotësisë juridike është bërë për 13,657. Të aprovuara janë 127,639 aplikacione dhe në pritje për aprovim janë 10,964.
Në këtë mbledhje Ahmetaj tregoi se nga qendra e thirrjeve janë realizuar 48, 712 thirrje deri më tani dhe se nga kjo shifër 41,131 janë të konfirmuara, kurse 115 aplikues kanë deklaruar se nuk janë ata që figurojnë në data bazë. Ahmeti njoftoi se 8466 persona nuk e kanë hapur telefonin./RTK