Ky është tifozi nga Peja që u arrestua pasi sulmoi basketbollistin e KB Rahoveci, Prokurori e ndalon për 48 orë

- in Lajme

Gazeta Sinjali raportoi sot për një incident që ndodhi të shtunën në Pejë, pas përfundimit të ndeshjes basketbolliste në mes të Klubit Peja dhe Klubit Rahoveci, ku u arrestua një tifoz, nën dyshimet se ka sulmuar një lojtar të klubit mysafir. I dyshuari pas arrestimit u dërgua në ndalim policor, teksa tashmë Sinjali ka mësuar identitetin e tij.

Burimet nga Prokuroria kanë bërë me dije se bëhet fjalë për Ron Kajtazin, 27-vjeçar, i cili sipas informacioneve të para e ka sulmuar basketbollistin e klubit të Rahovecit, Chirs Seeley, duke e gjuajtur me një karrige, çka i kushtoi me arrestim.

Situata u tensionua dhe ndërhyu Policia, ashtu që i dyshuari shoqëruar në stacion policor, ku pas intervistimit është dërguar në mbajtje për 48 orë, për veprën penale “Sulm”.

Ndryshe, KB Rahoveci ka pësuar humbje në këtë ndeshje me rezultat 86-76 ndaj Pejës, përkundër përpjekjeve maksimale.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata./Sinjali