Gazeta Sinjali sot raportoi për arrestimin e një 24-vjeçari në Fushë Kosovë pasi i njëjti u kap nga Policia e Kosovës me substanca narkotike.
Burimet e Gazetës Sinjali bëjnë me dije se dyshuari që ndalua nga njësia policore në rrugën “Theranda” është Amir Hetemi.
Pasi i njëjti u ndalua me qëllim të verifikimit dhe kontrollimit për sende të kundërligjshme, zyrtarët policorë i gjetën një sasi të narkotikut të fshehur në trup.
Si rezultat i kësaj, Hetemi është arrestuar dhe dyshohet se ka kryer veprën penale “Posedimi i paautorizuar i substancave narkotike, psikotrope ose analoge”.
Me urdhër të prokurorit të shtetit nga Prokuroria Themelore në Prishtinë, i dyshuari është ndaluar për 48 orë.
Sipas Kodit Penal të Republikës së Kosovës “Kushdo që pa autorizim posedon narkotikë, substanca psikotrope apo analoge, dënohet me gjobë dhe me burgim prej një (1) deri në tre (3) vjet.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
/GazetaSinjali/