Zbarkimi i një avioni luftarak i Britanisë së Madhe në Kosovë, ka nxitur mediat serbe që të raportojnë se Anglia po e furnizon me armë Kosovën, mirëpo sipas presidentes së vendit, Vjosa Osmani, raportimet e medieve serbe janë shpikje pasi vendi nuk po furnizohet me armë.
Por njejtë si presidentja Osmani, nuk po mendon deputeti i Listës Guxo, Haxhi Avdyli. Ai ka bërë të ditur se Kosova ka pranuar armë nga Britania, bile ka përmendur specifikisht se çfarë armë ka pranuar Kosova.
Në mes të krejt kësaj, dikush këtu është duke gënjyer dhe si duket nuk ka koordinim mes themeluesve të Listës Guxo, pra Vjosa Osmanit dhe Haxhi Avdylit.
Çka tha presidentja Osmani e çka deputeti Avdyli për furnizimin me armë nga Britania?
Presidentja e Kosovës, Vjosa Osman i ka quajtur shpikje, raportime e mediave serbe se Kosova po furnizohet me armë nga Britania.
“Tema që Kosova po militarizohet nga të tjerët është temë që ata e shpikin në mënyrë që të ndryshojë narrativat se kinse të gjithë po e bëjnë. Ne tash kemi partneritet me shtetet tjera…Ne nuk kemi marrë armë në kontekstin që po e thotë Vuçiq, por ne jemi partnerë me SHBA-në dhe anëtarët e tjerë të NATO-s, në mënyrë që ta furnizojmë ushtrinë tonë, me mjetet që ka nevojë”, ka thënë ajo në KallxoPernime.
Më tej, për këtë punë, Osmani ka thënë se Serbia po bën fushatë për të fshehur faktin që ajo po furnizohet me armatim nga Kina.
“Fushata e Serbisë kundër Kosovës dhe kundër partnerëve të Kosovës, gjithmonë vjen në momente kur ata tentojnë me fshehë diçka. Kjo ka filluar nga armatosja shqetësuese që po e bënë Serbia këto ditë sidomos, por ka ndodhur me muaj të tërë dhe siç e dini, Serbia partnerë në aspektin ushtarak e ka Rusinë dhe Kinën”, ka thënë Osmani.
E një mendim krejt tjetër për dallim nga Osmani, e ka deputeti i Listës Guxo dhe bashkëpunëtori i saj, Haxhi Avdyli.
Deputeti Avdyli para disa ditëve me informacionet e tij, ka treguar edhe emrin e armëve me të cilat është furnizuar ushtria e Kosovës.
“Kanë frikë që po rritet buxheti për ushtrinë e që nga Britania na erdhën Javelin dhe NLAË. Sa keq për ta e sa mirë për Kosovën”, ka shkruar Haxhiu dhe më poshtë mund të gjeni statusin e skrinshotuar.
Më tej, Haxhiu ka thënë se Ushtria e Kosovës po forcohet dhe po ecë përpara me liderë të pashantzhueshëm.
“Fatmirësisht koha dhe njerzit kanë ndërruar, e Kosova është në duar të sigurta.Ushtria po forcohet, Kosova po tregon çdo ditë e më shumë se është serioze e respekton veten, e kontribuon për paqen. Kosova po ecë përpara me liderë të drejtë e të pashantazhueshëm.”, ka shkruar ndër të tjera ai.
Në anën tjetër, mos-koordinimin e Osmanit dhe Avdylit e ka vërejtur edhe opinionisti Halil Matoshi.
Matoshi ka publikuar dy qëndrimet e kundërta të Osmanit dhe Haxhiut.
“Guxo e rrej”, ka shkruar shkurt, duke nënkuptuar që Avdyli apo Osmani kanë guxim të gënjejnë pasi edhe partia e tyre thirret ‘Guxo’.
Çfarë dihet deri më tani për aeroplanin ushtarak të Britanisë?
Për këtë aeroplan, që u bë temë këto ditë në vend, kishte njoftuar zyrtarisht KFOR-i.
Misioni paqeruajtës i NATO-s në Kosovë njoftonte se ai ka ardhur nga Britania për të ndihmuar ushtarët britanikë të vendosur në Kosovë.
“Këtë jave, avioni i forcave ushtarake të Mbretërisë ‘A400M’ fluturoi nga Britania në Kosovë, për të kryer një operacion ndihmës për forcat tokësore ushtarake britanike, në KFOR”, thuhet në postimin e publikuar në faqen zyrtare të KFOR-it, në Facebook.
Postimi i KFOR-it shoqërohej me fotografi të aeroplanit që po ateronte në Prishtinë.
KFOR nuk ka dhënë ndonjë version tjetër rreth këtij aeroplani, pas pretendimeve të presidentit të Serbisë, Aleksandar Vuçiqit ku bashkë me mediat serbe kanë anisur një propagandë se Mbretëria e Bashkuar po e armatos Kosovën.
Ndërsa, kryeministri i Kosovës, Albin Kurti ka thënë se mos të merren për bazë raportimet e mediave serbe.
“Nuk ka nevojë që ata (Beogradi), t’iu gënjejnë më shumë… e qe ta kuptoni se nuk duhet më t’i besoni asnjëherë”, ka thënë ai./ Nacionale