Ushtruesja e detyrës së shefit të grupit parlamentar të Lëvizjës Vetëvendosje, Mimoza Kusari-Lila u shpreh e bindur se në seancën e sotme do të arrihen votat e mjaftueshme për zgjedhjen e presidentit. Ajo tha se shpreson që procesi të përmbyllet me 80 apo 81 vota në kuti. Para mediave, Kusari-Lila ka thënë se nuk ka pasur shantazh ndaj deputetëve por vetëm thirrje për përgjegjësi.
Kusari-Lila: Presim të jenë 80 ose 81 vota për president
“Në lajm të mirë, sot jemi pozitivë dhe shpresojmë se ky proces do të përmbyllet dhe do të jenë 80 apo 81 vota që do të numërohen për kandidatët për presidentë të Republikës së Kosovës”, tha ajo.
Ajo tha se kanë konfirmimin që dy deputetët nga komunitetet jo shumicë, jo serbe, do të marrin pjesë në votim, ndërsa tha se nuk kanë marrë përgjigje nga deputeti i Partisë Demokratike të Kosovës, Xhavit Haliti.
Kusari-Lila: Kemi konfirmimet se dy deputetë nga komuniteti jo shumicë do të marrin pjesë në votim
“Kemi konfirmimet se dy deputetët e partive jo serbe, jo shumicë, janë në sallë, unë i pash që edhe fizikisht kanë hyrë në sallë… Nuk kemi marrë asnjë përgjigje nga zoti Haliti”, tha ajo.
Ajo tha se nuk ka pasur oferta ndaj këtyre deputetëve veçse prej tyre kanë kërkuar përgjegjësi më të madhe lidhur me këtë proces.
Ndërsa shefi i deputetëve të LDK-së, Arben Gashi, minuta më parë ka deklaruar se Lëvizja Vetëvendosje duhet të ndalë shantazhet në drejtim të deputetëve të LDK-së që kanë vendosur mos të marrin pjesë në votim.
Lidhur me këtë, Kusari-Lila tha se nuk ka pasur shantazh por vetëm thirrje në përgjegjësi.
Kusari-Lila: Nuk ka pasur shantazh ndaj deputetëve
“Në këto momente nuk jemi, as në gjuhë të shantazhit, as në gjuhë të kërcënimit, as në gjuhë të dhënies në spikamë përveç thirrjes në përgjegjësi të deputetëve për faktin se ne marrim besimin, japim betimin dhe ligjërisht duhet të japim edhe llogari para qytetarëve të Republikës për vendimet që i marrim në sallë apo për votimet që i bëjmë në seancën plenare… Andaj të karakterizohet një deklaratë e imja, për të cilën ishin të vëmendshëm të gjithë, u pa se ata të tre personat e lartpërmendur nuk votuan, nuk morën pjesë fare në votim edhe pse ishin në sallë, duke bërë kështu të pamundur dje zgjedhjen e presidentit të vendit, mendoj se është pak sa e tepruar”, tha ajo./KP