Kryeministri i Kosovës, Albin Kurti, po merr pjesë në Forumin e Diplomacisë në Antalia të Turqisë ku gjatë ditës ka zhvilluar takime me liderë të ndryshëm nga Evropa.
Kurti ka njoftuar se në hapësirat ku po mbahet forumi, e ka takuar edhe Përfaqësuesin e Lartë të Bashkimit Evropian, Josep Borrell.
Përmes një postimi në Twiter, Kurti ka treguar se ka kërkuar nga Borell më shumë vëmendje drejt Ballkanit Perëndimor.
“Kërkova nga Përfaqësuesi i Lartë i BE-së për Punë të Jashtme dhe Politika të Sigurisë, më shumë vëmendje drejt Ballkanit Perëndimor si dhe të mos injorojë luftën proksi dhe hibride të Rusisë në rajonin tonë”, ka shkruar Kurti.
Kurti ka thënë se sanksionet janë më e pakta që mund të bëhen kundër Rusisë në këtë kohë lufte.
Kryeministri Kurti ka takuar edhe përfaqësuesin Special të Bashkimit Evropian për Dialogun Kosovë-Serbi dhe çështje të tjera rajonale të Ballkanit Perëndimor, Miroslav Lajçak.
Ai ka zhvilluar takime edhe me ministrin e Jashtëm të Austrisë Alexander Schallenberg, Përfaqësuesin e Lartë Ndërkombëtar në Bosnje e Hercegovinë Christian Schmidt dhe zëvendëskryeministrin e Malit të Zi, Dritan Abazoviq.