Kryetari i Lëvizjes Vetëvendosjes Albin Kurti deklaroi sot se qeveria e drejtuar prej tij do të punojë për t’i fuqizuar sa më shumë personat me Sindromën Down.
Ai gjatë një vizite sot në Qendrën e Down Syndrome Kosova me rastin e Ditës Botërore të Sindromës Down, tha se të gjithë qytetarët e Kosovës, pavarësisht sfidave dhe nevojave që ata mund të kenë, do të kenë një jetë të dinjitetshme.
Gjatë kësaj vizite Kurti ishte i shoqëruar edhe nga ushtruesja e detyrës së presidentes Vjosa Osmani dhe deputetet e legjislaturës së re, Arbërie Nagavci dhe Jeta Statovci.
Kurti dhe Osmani nga drejtoresha ekzekutive e DSK-së Sebahate Beqiri u informuan me programet e kësaj qendre, punëtoritë, dhe aktivitetet tjera për fuqizimin e personave me Sindromën Down.
Beqiri tha se nga institucionet e reja pret përkrahje dhe mbështetje në punën e tyre për shkak se mirëqenia e personave me Sindromën Down është detyrë dhe përgjegjësi e të gjithëve. /KP