Çështja e Zgjedhjeve parlamentare dhe presidenciale të Serbisë është diskutuar me të madhe në Kosovë për shkak të qëndrimit të Qeverisë Kurti II për moslejimin e tyre dhe trysnisë ndërkombëtare për të kundërtën. Por, cilët janë kandidatët për president të shtetit fqinj?
Duke qenë se Serbia është shtet presidencial, pozita e presidentit është më e pushtetshmja. Kjo i bën zgjedhjet të rëndësishme, madje edhe për Republikën e Kosovës që po vazhdon negociatat me shpresë për njohjen dhe normalizimin e marrëdhënieve.
Për njërin kandidat, veçse dimë dhe madje dimë shumë. Është fjala për presidentin aktual, Aleksandër Vuçiq, i cili ka marrë 148 mijë e 846 nënshkrime në kandidaturën e tij. Ai është edhe kandidati kryesor për të fituar garën presidenciale dhe garon prej Partisë Progresive Serbe.
TË T J E R Ë T
Kandidatët tjerë kanë marrë numër dukshëm më të vogël nënshkrimesh në garën për t’u bërë president.
Po e nisim me Milica Gjurgjeviq Stemenkovskin. Ajo ka marrë 11 mijë e 102 nënshkrime dhe është politikane e së djathtës ekstreme.
Gjurgjeviq është politikane vetëm 31 vjeçare që me profesion është politologe. Ajo është bërë e njohur kur si 17 vjeçare kishte qenë pjesë e protestave të ultra-nacionalistëve serbë kundër shpalljes së Pavarësisë së Kosovës në vitin 2008. Ajo ka protestuar edhe kundër arrestimit të Radovan Karagjiqit e Ratko Mlladiqit dhe kundër zbatimit të marrëveshjeve në Bruksel mes Kosovës dhe Serbisë.
Pra, nëse ajo zgjidhet presidente, vaj halli për Kosovën, por edhe më vaj halli për Serbinë.
I treti që do të përmendim mes tetë kandidatëve të konfirmuar deri tash, është Milosh Jovanoviq. Edhe Jovanoviqi është politolog, por gjithashtu edhe avokat me profesion. 45 vjeçari është kryetar i Partisë Demokratike të Serbisë dhe ka qenë edhe deputet në Asamblenë Kombëtare të këtij shteti.
Edhe ky politikan e përshkruan veten si “të djathtë” dhe ka shprehur bindje euroskeptike duke e konsideruar Bashkimin Evropian si “të vdekur”.
Po ashtu, ai është kundër njohjes së Pavarësisë së Kosovës.
Në një intervistë për gazetën Danas në maj të vitit 2020, ai kishte thënë:
“Natyrisht, historia nuk duhet të harrohet. Përkundrazi, memorja historike duhet të kultivohet sepse populli serb ishte viktima më e madhe e luftërave të viteve ’90. Dy krimet më të mëdha janë kryer kundër nesh. I pari ishte në vitin 1995, kur Kroacia kreu spastrim etnik dhe dëboi serbët nga Krahina. I dyti ishte më 1999, kur NATO kreu agresion kundër shtetit tonë dhe kreu krimin më serioz – krimin kundër paqes.”
Jazëk!
I katërti është Boshko Obradoviq. Edhe ky është 41 vjeçar, dhe edhe ky është i djathtë. Qëndrimet e tij po ashtu janë të papranueshme. Boshkoja ka marrë 11 mijë e 20 nënshkrime.
I pesti është ish-gjenerali Zdravko Ponosh, politikan 59 vjeçar nga një fshat në afërsi të Kninit. Ai është i dekoruar nga Sllobodan Millosheviq për punën e bërë si ushtarak në Kosovë.
Ai e përshkruan veten si “politikan të qendrës” që është pro anëtarësimit të Serbisë në Bashkimin Evropian.
Po ashtu, ai ka qenë mbështetës i anëtarësimit të Serbisë në Partneritetin e Paqes dhe bashkëpunimit me NATO-n por kundërshton anëtarësimin e Serbisë në këtë aleancë.
Por, edhe Ponosh është kundër njohjes së Pavarësisë së Kosovës duke e quajtur si diçka që “asnjë qeveri demokratike në Serbi nuk mund ta pranojë”. Ai ka marrë 11 mijë e 786 nënshkrime.
Kandidate tjetër grua për presidente të Serbisë është edhe Branka Stamenkoviq, një politikane 53 vjeçare.
Ajo është përkthyese që ka përkthyer nga fusha si psikologjia e astrologjia. Por, edhe vetë ka punuar si astrologe.
Nuk dihet se çka do t’i thotë Horoskopi për njohjen e Pavarësisë së Kosovës nga Serbia.
Gjasat e saj për t’u bërë presidente e Serbisë janë të vogla, sidoqoftë ajo i ka marrë 10 mijë e 46 nënshkrime.
Kandidatja e shtatë për presidente është Biljana Stojkoviq, një biologe 49 vjeçare serbe.
Ajo e përshkruan veten si humaniste sekulare dhe mban bindje të majta dhe kundër luftës. Po ashtu, ajo është kundërshtare e kreacionizmit, duke mohuar të gjitha shpjegimet fetare si pjesë të kurrikulës shkollore.
Biljana e ka quajtur Vuçiqin autokrat, por megjithatë është kundër njohjes së Pavarësisë së Kosovës edhe pse ka protestuar kundër regjimit të Sllobodan Millosheviqit.
Dhe i fundit është Misha Vaçiq, një politikan i ri 36 vjeçar i së djathtës ekstreme. Dhe e djathta ekstreme si pozicion flet mjaftueshëm për të gjitha qëndrimet e tjera të tij./Nacionale