Kryetari i PDK-së, Memli Krasniqi, ka folur në Kuvendin e Kosovës rreth Ligjit për Masat e Përkohshme për produktet esenciale.
Krasniqi në Kuvendin e Kosovës e ka kritikuar ashpër këtë Ligj, duke thënë se qeveria po merret me gjetjen e fajtorëve imagjinarë.
“Nuk kisha besu që në Republikën e Kosovës do të diskutohej ndonjëherë. Me këtë projektligj po vazhdon kjo qeveri që tendencën me paraqit krizën me rritjen e çmimeve, që po shkaktohet nga disa abuzues të çmimeve. Kryesisht imagjinarë, e jo nga forcat e tregut. Ky është preteksti që qeveria i ka ikur përgjegjësisë. Nuk kanë paraqit asnjë evidencë që tregon se rritja e çmimeve po shkaktohet nga abuzuesit. Pikërisht kjo ministre që ka thënë se e kemi gjetur fajtorin, fajtor janë minimarketet. Këta të voglit të lagjeve. I shpalli armiq”, deklaroi Krasniqi.
“E pasni bo një ligj me i mbyllë këto minimarkete, e tregtarë të vegjël nëpër Kosovë. Shqetësues jashtëzakonisht që qeveria si mjet primar për krizë i konsideron intervenimet në treg. Ekonominë e lirë me këtë ligj po doni me e thy. Nuk e di qysh e arsyetoni një gjë të tillë, as për një javë nuk mundeni, e lëre më pa afat”, deklaroi më tutje Krasniqi.
Krasniqi ka deklaruar se kushdo që e ka bërë këtë ligj, duhet të shkojë në pushim.
“Nuk është punim i shkencave sociale, është ligj, duhet të jetë i qartë. Në bazë të çka mundeni me thënë është çmim i pajustifikueshëm. Krejt ky ligj është i paqartë e me terme fluide. Kush e ka shkru ish dashtë me çu në pushim menihere ju”, përfundoi Memli Krasniqi.