Profesori universitar dhe njohësi i zhvillimeve politike në vend, Milazim Krasniqi, reagon shpeshherë në profilin e tij zyrtar të rrjetit social “Facebook”.
Megjithatë, sot befasoi për të keq. Kjo pasi, teksa shkroi për rastin e Martin Berishajt, kritikoi shqiptarët e Malit të Zi, madje duke shkuar aq larg sa zgjodhi disa prej tyre dhe u duk sikur në përgjithësi kërkoi kthimin e tyre në Mal të Zi, përcjell Gazeta Nacionale.
“Ama tash e kam një ide më të mirë: në paketë me qata 8000 hektarë tokë që thonë se i janë falë Malit të Zi, ka qenë mirë me ia pasë kthyer edhe kuadrot shqiptare me prejardhje nga Mali i Zi, që nga qeveria, Akademia e diplomacia”, shkroi ndër të tjerash ai.
Duke parë reagimet e shumta në rrjetet sociale, njëri prej themeluesve të PDK-së e babai i kreut të PDK-së, Krasniqi, u paraqit sërish.
Kësaj radhe mohoi ta ketë pasur fjalën për përgjithësi, por vetëm veçanti.
“Shqiptarët e Malit të Zi janë bashkëkombasit tanë dhe Kosova i ka mirëpritur gjithmonë. Edhe ata kanë kontribuar për Kosovën”, shënoi ai.
Por, nuk vonoi shumë dhe erdhi radha për njërin prej shqiptarëve të Malit të Zi, që jeton e vepron në Kosovë.
Genc Prelvukaj. Këngëtari dhe dikur aktivisti politik, përmes një historie të shpalosur në një postim, tregoi themeluesin e fshatit Prekaz të Skënderajt.
Tutje ai tha se po këta njerëz, më 1998, i dhanë Kosovës një prej lavdive më të mëdha, çlirimin.