Të gjitha aparaturat në Klinikën e Onkologjisë së QKUK-së, janë të zhytura në ujë tash e një javë. Kjo pas reshjeve të shiut që ranë të enjten e fundit të qershorit në Kosovë. Sherrin kësaj situate po ia shohin më së shumti pacientët kosovarë, e sidomos ata që kanë nevojë për shërbime onkologjike si pasojë e sëmundjes së kancerit, leukemisë e tumoreve të ndryshme. E se kur do të rregullohen këto aparatura, nuk dihet. Si rrjedhojë të gjithë pacientët me kancer që kanë nevojë për terapinë ditore të rrezatimit, janë të detyruar që atë ta marrin jashtë Kosovës. Në QKUK ishte vetëm një aparaturë e tillë.
Ka disa muaj që një 47-vjeçar, pjesëtar i policisë së Kosovës është diagnostikuar me tumor. Tek ai mjekët kishin rekomanduar që të kryheshin gjithsej 20 rrezatime në mënyrë që gjendja shëndetësore të haste ndonjë përmirësim.
Por, ky pacient siç duket nuk pati fat të mirë në kryerjen e këtyre rrezatimeve. Ai arriti që t’i përfundojë vetëm gjashtë sosh. 14 të tjera iu pamundësuan atij. Dhe kjo, jo se nuk deshi apo gjendja e rëndë ia pamundësoi. Por, se aparatura ku ai e merrte këtë shërbim është vërshuar nga uji.
Në një deklaratë për Nacionalen, të afërmit e këtij polici kanë treguar për dëmet që i janë shkaktuar atij si pasojë e mos-funksionimit të aparaturës për kryerjen e këtyre rrezatimeve.
“Pas ndërprerjes së këtyre rrezatimeve, i afërmi ka humbur shikimin. Kjo gjendje ndoshta do të kishte ndodhur edhe po të kryente rrezatimin, mirëpo për familjen do të ishte më e lehtë për ta pranuar nëse kjo gjendje do të vinte nëse do të kryhej rrezatimi,” – deklarojnë familjarët.
E ky pacient por edhe qindra të tjerët që marrin shërbime të tilla të rrezatimit në Kosovë, adresë të vetme për trajtimin e tyre të paktën për disa ditë do t’i kenë spitalet rajonale.
Kështu i tha Nacionales, drejtori i Klinikës së Onkologjisë së QKUK-së, Ardian Millaku.
“Të enjten e kaluar që patëm vërshime është dëmtuar, ka hy uji aty dhe është e pamundshme që të vihet njëherë në funksion. Tash teknika aty po e shohin se çka është dëmtua e të lëshohet në funksion. Në pacientët i kemi lajmërua. Kolegjiiumi i mjekëve ka ba rekomandim që të dërgohen për trajtim jashtë vendit që mos t’i lemë gjatë pa trajtim,” thotë Millaku.
Sipas tij, nevoja për këtë aparat është jashtëzakonisht e madhe.
“Është mirë që atë me e vendosë diku ku s’ka probleme të tilla. Në QKUK s’ka kërku tjetër aparaturë të tillë,” – thotë Millaku.
Në shërbimin ditor te pjesa e rrezatimeve, brenda ditës, trajtim pra rrezatime marrin deri në 80 pacientë.
E nga ShSKUK kanë njoftuar se ekipet e Klinikës së Onkologjisë, bashkë me sektorin teknik dhe atë të pajisjve mjekësore të QKUK-së, kanë ndërmarrë veprime të menjëhershme duke çkyçur nga puna aparaturën e radioterapisë, me qëllim të parandalimit të pasojave të paparashikueshme.
Në ndihmë kanë ardhur edhe ekipi zjarrfikësve dhe shërbimeve komunale të cilët kanë asistuar gjatë gjithë kohës.
Aparatura e Radioterapisë për momentin është jashtë funksionit, kurse shërbimet e tjera në Klinikën e Onkologjisë po ofrohen normalisht.
“Ekipi i kontraktuar për mirëmbajtje të aparaturës mjekësore është duke analizuar situatën e aparaturës së radioterapisë dhe bazuar në vlerësimin final dhe testimet e nevojshme, Kolegjiumi i Klinikës së Onkologjisë do të dalë me rekomandime, se si do veprohet më tutje me trajtimin e rasteve në radioterapi”, thuhet në njoftim.
Sipas QKUK-së, të gjithë pacientë e planifikuar për radioterapi janë njoftuar përmes telefonit në lidhje me situatën e krijuar dhe do të mbahen të informuar.
Ndërkohë në Onkologjinë e QKUK-së të enjten qëndroi edhe ministri i shëndetësisë, Rifat Latifi për ta parë nga afër situatën./Nacionale.com/