Komunat e Kosovës kanë pasur rënie prej 1 përqind të transparencës për vitin 2020. Njëra prej arsyeve për një gjë të tillë po konsiderohet funksionimi i administratës publike me kapacitete të kufizuara përshkak të pandemisë Covid 19. Megjithëkëtë, ndër komunat më transparente gjatë vitit të kaluar janë Prishtina dhe Lipjani.
Ndërkohë si element pozitivë, gjatë prezantimit të hulumtimit të Institutit Demokratik të Kosovës (KDI) u tha se është lehtësia më e madhe në qasjen në dokumentet publike të komunave.
Përmes një konference për medie, Diana Metushi-Krasniqi nga KDI tha se rënia e transparencës gjatë vitit të kaluar paraqiti një frenim të trendit të vazhdueshëm pozitiv ndër vite.
Metushi-Krasniqi: Transparenca e përgjithshme për vitin 2020 është 69 përqind
“Transparenca e përgjithshme për vitin 2020 është 69 përqind, krahasuar me 70 përqind të vitit 2019. Ndonëse kjo nuk është një ngecje e madhe, duke pas parasysh vështirësitë që jemi ballafaquar gjatë vitit 2020, ajo pati një frenim në trendin e vazhdueshëm pozitiv të dëshmuar në vitet e fundit. Një nga shkaqet kryesore për këtë rënie të transparencës ishte funksionimi i administratës publike me kapacitetet të kufizuara për pjesën më të madhe të vitit të kaluar”, tha ajo.
Metushi-Krasniqi tha se gjatë vitit 2020 komunat kanë treguar një vullnet më të lartë për t’iu përgjigjur pozitivisht kërkesave për qasjen në dokumente publike.
Metushi-Krasniqi: Viti 2020 shënoi një trend pozitiv në qasjen në dokumente publike
“Viti 2020 shënoi një trend pozitiv në qasjen në dokumente publike, bazuar në përgjigjet që kemi marrë nga komunat. Kemi pa se përderisa është ulur numri i kërkesave për qasje në dokumente publike, komunat kanë treguar një vullnet më të lartë për t’iu përgjigjur pozitivisht këtyre kërkesave”, u shpreh ajo.
Derisa edhe i bëri publike komunat më transparente.
Metushi-Krasniqi: Prishtina dhe Lipjani komunat më transparente
“Komunat më transparente janë komuna e Prishtinës, komuna e Lipjanit, komuna e Gjakovës, Vushtrrisë. Rahovecit, Junikut dhe kështu me radhë”, tha ajo.
Ky hulumtim i KDI-së në komunat e vendit ka përfshirë transparencën në prokurimin publik, transparencën buxhetore, dokumentet publike, informimin dhe pjesëmarrjen e publikut, garantët dhe financimin dhe etika profesionale dhe konflikti i interesit./E.Zeqiri/KP