Nën përkujdesje të kryetarit Xhafer Gashi, komuna e Obiliqit ka shënuar sot 13- vjetorin e shpalljes së Pavarësisë së Kosovës.
Fillimisht në mëngjesin e hershëm, kryetari Gashi me bashkëpuntorë bënë homazhe pranë lapidarëve e varrezave të dëshmorëve dhe martirëve të Obiliqit, për të vazhduar me një akademi solemne në Shtëpinë e Kulturës “Xhavit Haziri”.
Kryetari Gashi, në fjalën e tij para të pranishmëve, vlerësoi lart kontributin ndër breza për liri dhe pavarësi.
“Sot me respekt të madh nderojmë luftën e Ushtrisë Çlirimtare të Kosovës, kujtojmë dhe respektojmë sakrificën e dëshmorëve, martirëve dhe të gjitha viktimave të luftës çlirimtare. Kujtojmë lëvizjet ilegale, studentore, idealistët që ia përkushtuan jetën çështjes së atdheut, punën e presidentit Rugova, heroizmin e pashoq të komandantit legjendar Adem Jashari, e shumë heronjve tjerë që e vulosën pavarësinë e Kosovës”, tha Gashi.
Ai kërkoi që të gjithë të punojnë së bashku për realizimin e aspiratave të atyre që dhanë jetën për atdhe, si dhe të punojmë për një Kosovë e cila garanton të ardhme të sigurt për fëmijët tanë.
Në këtë akademi solemne u ndanë mirënjohje për familjarët e dëshmorëve dhe martirëve të komunës së Obiliqit, ndërsa është mbajtur edhe një program kulturor nga ansambli i qytetit. KosovaPress