Komisioni për Integrime Evropiane është konstituar të martën në Kuvendin e Kosovës. Prioritet i këtij komisioni u tha se është përmbushja dhe zbatimi i MSA-së. Ndërkohë, u debatua edhe nevoja që ky komision të kërkojë nga BE-ja vaksina kundër Covid-19.
Ishte deputetja e PDK-së, Blerta Deliu-Kodra që e paraqiti nevojën që Komisioni për Integrime Evropiane të kërkojë nga BE-ja vaksina, por që fillimisht nga Lëvizja Vetëvendosje u kërkua koordinim me Ministrinë e Shëndetësisë, e më pastaj të ndërmerren hapat e nevojshme.
Deliu-Kodra: Të provojmë t’i parashtrojmë kërkesë BE-së për sigurim të vaksinave
“Si anëtarë të komisionit kisha kërkuar që të provojmë t’i parashtrojmë kërkesë Komisionit Evropian dhe shteteve anëtare të BE-së, meqenëse jemi nënshkrues të MSA-së dhe kemi hyrë në marrëdhënie kontraktuale me BE-në, të kërkojmë për mundësitë që ne të pajisemi me vaksinë, pasi me këtë numër të vogël të vaksinave është e pamundur që të kemi një përmbushje të asaj që është premtuar për vaksinimin e qytetarëve të Kosovës”, u shpreh ajo.
Mungesën e vaksinimit te deputetët e ngriti, Time Kadrija nga AAK-ja, e cila tha se nëse hapet Evropa, pa pasaportën e imunizimit nuk mund të lëvizin në BE.
Kadrija; Nëse hapet Evropa, ne si deputetë ende nuk e kemi marrë vaksinën dhe nuk mund të lëvizim
“Me kërkuar prej BE-së që Kosova të ketë më shumë vaksina sepse me një ndihmë të tillë është e pamundur. Po shihet se tashmë veçse po bëhet pasaporta e imunizimit me vaksinë dhe nëse nuk vaksinohesh e ki të pamundur me lëvizë. Nëse hapet Evropa, ne si deputetë ende nuk e kemi marrë vaksinën, jo që po kërkojmë para shumicës së popullit, por edhe me ekzistuar ajo mundësi ne nuk mundemi të lëvizim për shkak se nuk kemi pasaporta të imunizimit. Duhet t’i shterim të gjitha mundësitë ta thirrëm edhe shefin e BE-së për të apeluar”, tha ajo.
Këtë kërkesë e mirëpriti deputetja e mazhorancës, Arbëreshë Kryeziu, por e cila kërkoi fillimisht të ketë koordinim me Ministrinë e Shëndetësisë.
Kryeziu; Fillimisht do të duhej të kemi një koordinim edhe me Ministrinë e Shëndetësisë
“Fillimisht do të duhej të kemi një koordinim edhe me MSH sepse kemi parë që qeveria aktuale e ka shtruar këtë temë. Kjo po vazhdon të jetë njëra ndër prioritetet kryesore të qeverisë dhe ministrit. Po presim që kontingjenti i radhës i vaksinave të arrijnë në fundin e prillit, ose fillimin e muajit maj më së largu”, theksoi ajo.
Por deputetja e PDK-së, Deliu Kodra tha se deputetët janë të pavarur ne vendimet që i marrin dhe nuk mund të presin në pafundësi sigurimin e vaksinave nga ana e MSH-së.
Deliu-Kodra: Ne jemi të pavarur në qëndrimet dhe vendimet që i marrim
“Ne jemi të pavarur në qëndrimet dhe vendimet që i marrim. Iniciativën që të kërkojmë vaksina mendoj që i tejkalon dallime tona politike që i kemi edhe në këtë komision. Pavarësisht faktin se ministria po tenton tash e sa kohë, numri është i ulët dhe ne nuk mund të presim pafundësisht”, tha ajo.
Deputetët në këtë komision diskutuan edhe për liberalizimin e vizave dhe qasjen që duhet të përdorë Kosova që t’i bind vendet skeptike./E.Zeqiri/KP