Gazeta Sinjali sot raportoi ekskluzivisht për një përleshje që ndodhi më 9 korrik në një kafeteri në Kamenicë, ku u përfshinë katër persona, njëri prej të cilëve është zyrtari policor Flamur Keka. Ai dyshohet se bashkë me tre persona tjetër janë rrahur mes vete në lokalin ‘Loungebar Moe”. Por kush janë të dyshuarit tjerë, përveç policit Keka?
Burimet brenda Prokurorisë kanë bërë me dije se bëhet fjalë për Barlet Ahmetin, Qendrim Bojkun dhe Asdren Ahmetin, ndaj të cilëve Prokuroria ka nisur hetimet.
Katër të rinjtë janë përleshur në kafeteri me njëri-tjetrin, pas një mosmarrëveshje që nisi aty dhe eskaloi në sulm fizik. Si pasojë e goditjeve, të dyshuarit e përfshirë në rrahje pësuan lëndime trupore, për çka u dërguan në Emergjencën e Gjilanit, për trajtim mjekësor, e më pas u shoqëruan në stacion policor.
Burimet thonë se me urdhër të Prokurorit të Shtetit dhe në koordinim me IPK-në, ndaj policit Keka është iniciuar rast dhe i njëjti është liruar. Të dyshuarit e tjerë do të hetohen nga Prokuroria Themelore në Gjilan për veprën penale “lëndim i lehtë trupor”.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.