Kryetari i Komunës së Prishtinës, Përparim Rama, po duket gjithnjë e më larg fillimit të punëve për zgjidhjen e problemeve të ngutshme të kryeqytetit dhe gjithnjë e më larg Lidhjes Demokratike të Kosovës (LDK). Por, ky largim na del krejt i pritshëm nëse marrim parasysh një histori të shkurtër e interesante të Ramës me kryeministrin Albin Kurti.
Në garën zgjedhore për të parin e kryeqytetit, Përparim Rama dhe Arben Vitia – kandidati i LDK-së kundër atij të VV-së, respektivisht – nuk kishin kursyer edhe sulmet e ulëta ad hominem ndaj njëri-tjetrin.
Nëse z. Rama pyeste me cinizëm Vitinë “A ta vizatoj?” ky i fundit ia kthente “Lëreni cinizmin zotri Rama!” Por, për më keq, Vitia nuk ngurroi madje të bënte edhe një videospot ku e sulmonte në të folmen e tij kandidatin e LDK-së që do të bëhej edhe kryetar i Prishtinës.
Sidoqoftë, rivaliteti politik mes Vetëvendosjes dhe Përparimit del të mos ketë qenë aq real e i vërtetë sa paraqitej në publik. Ose të paktën, del të ketë qenë vetëm elektoral (i përmbajtur brenda kohës sa zgjati fushata elektorale).
Prej ardhjes së tij në krye të komunës më të rëndësishme në Kosovë, Rama është kritikuar ashpër për qasjen e ngadaltë të tij në kryerjen e punëve.
Kjo qasje e ngadaltë është krahasuar me qasjen e Qeverisë Kurti II por edhe të kryetarëve të Vetëvendosjes në krye të komunave të Kosovës.
Edhe përkundër kritikave nga analistë dhe anëtarë të shoqërisë civile, Rama megjithatë është kursyer nga partia më e madhe opozitare në kryeqytet, Lëvizja Vetëvendosje.
Së fundi, VV-ja në Prishtinë ka deklaruar se Ramës i nevojitej “përkrahja politike”nga LDK-ja duke e rritur edhe më shumë tensionin mes kryetarit të Prishtinës dhe kryetarit të LDK-së.
E VVërteta e Përparimit
Burime të Nacionales nga niveli qendror i Lidhjes Demokratike i kanë thënë gazetës Nacionale se janë shumë të “nervozuar” me qasjen e kryetarit të Prishtinës të cilin e kishin kandiduar vetë.
Për më tepër, këto burime thanë që Lumir Abdixhiku e kishte humbur “krejtësisht kontrollin” që kishte pasur te Rama.
Por, Përparim Rama ka një histori të mbështetjeve politike që ka bërë në të kaluarën e tij.
I ftuar në një emision argëtues televiziv, ai kishte deklaruar se nuk e njihte fare Isa Mustafën – ish kryetarin e LDK-së – i cili nga Lumir Abdixhiku ishte emëruar kryetar nderi i partisë.
Rama ishte shprehur gjatë fushatës elektorale se kryeministri Albin Kurti madje edhe e kishte festuar ditëlindjen te shtëpia e tij në Londër.
“Edhe Albini ka qenë në shtëpinë time, ka festuar ditëlindjen, kemi kontakte, mendoj që ka me qenë një bashkëpunim i mirëfilltë. Kurti është kryeministër, unë jam kryetar i komunës, dhe duhet të bashkëpunojmë për të mirën e popullit. Ai mendon për të mirën e popullit, edhe unë mendoj po ashtu. Nuk mendoj që ka me mungu bashkëpunimi mes neve,” – ishte shprehur z. Rama.
Sidoqoftë, se Rama ka qenë mbështetës i Albin Kurtit në të kaluarën e dëshmojnë edhe postime të ndryshme të bëra në rrjetet sociale të Internetit.
“Kuptimi i emrit Albin: Një sillje mjeshtërore që mund t’i mësojë nja dy gjëra Alastair Campbellit” – thuhej në njërin.
Campbell ishte një strategjist britanik që kishte punuar gjatë lidershipit të Tony Blair në Partinë Laboriste. Ai duket se kishte pasur një zënkë me kryeministrin Albin Kurti në atë kohë.
Ndërkohë që në tjetrin, Rama i jepte mbështetje z. Albin Kurti për zgjedhjet e qershorit të vitit 2014.
Marrë parasysh gjithë sa u tha, kalimi i z. Rama – që nuk duket të ketë pas vetes ndonjë ideologji të caktuar – në Vetëvendosje nuk duket se do të përbëj befasi të madhe në opinionin publik.