Shefi i Grupit parlamentar të AAK-së Besnik Tahiri është përplasur në seancën e Kuvendit me Ministrin e Financave, Hekuran Murati.
Tahiri e ka quajtur Muratin “ministrin më të dështuar të Qeverisë”, pasi sipas tij Ministria që ai drejton nuk po i merr parasysh kërkesat e kryetarëve të komunave.
Tahiri ka përmendur këtu rrugën Prishtinë-Podujevë, që ishte një nga premtimet e VV-së në fushatë zgjedhore.
“Je ministri ma i dështum në Qeverinë Kurti. Është rruga Prishtinë-Podujevë. Jeni dalë në fushatë zgjedhore jeni ba gaz. Mos fol kështu, fol me argumente. Del thua ju keni lista dëshirash. Unë nuk kam listë dëshirash se skam kurrë nevojë për ty. Pres me pasë një diskutim përmbajtësor me argumente. Kryetarët e komunave t’i kanë çu kërkesat për disa ligje, diskuto me ta”, ka thënë Tahiri në Kuvend.
Derisa, ministri i Financave Hekuran Murati, i është kundërpërgjigjur deputetit Tahiri duke i thënë se të gjitha komunat do të trajtohen njësoj, e jo si janë trajtuar më herët nga pushtet e tjera.
“Është e pavërtetë që u tha se po bllokohen projektet komunale nga qeveria apo ministria. Kushdo që e din se si funksionon pushteti lokal e din që komunat kanë autonomi të plotë sa i përket shpenzimit të buxheteve të tyre. Të gjitha projektet që i kanë mund t’i kryejnë që sot. Madje kërkesa ime si ministër i Financave është që të ketë dinamik sa më e shpejtë e projekte. Asnjë projekt nuk bllokohet nga qeveria e ministria. Të gjitha komunat do të trajtohen njësoj, e jo si janë trajtuar më herët nga pushtet e tjera”, tha Murati.