Gazeta Sinjali mbrëmë ka raportuar për një rast të bashkëjetesës së një vajze të mitur me një person të rritur në komunën e Rahovecit. Viktima 16-vjeçare e cila bashkëjeton me të dyshuarin që nga viti 2020 dhe me të ka një fëmijë, ka denoncuar partnerin e saj për dhunë në familje. Si rezultat i denoncimit, 28-vjeçari ka përfunduar në prangat e Policisë.
Burimet e Gazetës Sinjali brenda Prokurorisë kanë bërë me dije se bëhet fjalë për Besnik Mullaliu, i cili dyshohet se ka ushtruar dhunë ndaj vajzës së mitur me të cilën bashkëjeton.
Sinjali mëson se ai përpos kësaj, vajzën 1 vjeç e gjysmë të cilën e ka nga martesa e përbashkët me të miturën, e ka marrë nën përkujdesjen e tij dhe e ka larguar nga nëna e saj. Pos të tjerave, ai dyshohet se ka kërcënuar edhe babain e viktimës.
Pas arrestimit Mullaliu është shoqëruar në stacion policor ku është intervistuar në praninë e avokatit të tij mbrojtës.
Pas përfundimit të procedurave policore, Prokurori i Shtetit ka urdhëruar që 28-vjeçari të ndalohet për 48 orë nën dyshimet për kryerjen e veprave penale ‘Dhunë në familje’ dhe ‘Kanosje’. Ai po ashtu do të hetohet edhe për veprën ‘Bashkësia jashtëmartesore me personin nën moshën 16-vjeçare’.
Ndërkohë Qendra për Punë Sociale ka intervenuar dhe ka mundësuar që fëmija të kthehet te nëna dhe viktima ka vendosur që të vazhdojë jetën në shtëpinë e familjes së saj.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata./Sinjali