Dy shtetas francezë janë arrestuar në fshatin Jashanicë të Leposaviqit, pasi me një veturë me targa ruse kanë hyrë ilegalisht në Kosovë nga territori i Serbisë.
Policia njofton se të dyshuarit janë B.G dhe A.F.
“Me datën 25.07.2022 rreth orës 17:50, në fshatin Jashanicë, Komuna e Leposaviqit, Njësitet Policore Kufitare-DRK-Veri, kanë ndaluar automjetin Land Rover, ngjyrë e bardhë, me targa të huaja (ruse), në të cilin gjendeshin dy persona meshkuj, B.G. (1954) dhe A.F. (1986), me shtetësi franceze, të cilët kishin hyrë nga territori I Serbisë në territorin e Republikës së Kosovës duke kaluar në mënyrë ilegale vijën kufitare”, thuhet në njoftimin për media.
Të njëjtit dyshohet se kanë kryer veprën penale ‘Kalimi i paautorizuar i vendkalimeve kufitare ose i vijës kufitare’.
“Për të gjitha veprimet është njoftuar prokurori kompetent i Prokurorisë Themelore në Mitrovicë, i cili ka autorizuar inicimin e rastit dhe me vendim të prokurorit, të dyshuarit dërgohen në mbajtje”, thuhet tutje në njoftim.
Njësi relevante të Policisë së Kosovës janë duke e trajtuar dhe hetuar rastin. /Telegrafi/
