Kryetari i PDK-së, njëherësh kandidat për kryeministër, Enver Hoxhaj, në ditën e fundit të fushatës zgjedhore ka marrë pjesë në një tubim madhështor në Vushtrri.
Ai para qytetarëve dhe simpatizantëve të shumtë, tha se PDK-ja është partia që është goditur më së shumti nga Gjykata Speciale, por megjithatë nuk u dorëzua.
E kjo goditje sipas Hoxhajt bëri që PDK-ja të tregojë edhe më shumë unitet, vendosmëri, solidaritet i cili po kthehet në votë për këtë parti.
Hoxhaj: Goditja e 5 nëntorit unifikoi edhe më shumë PDK-në
(Video)
“Çdo kush ka menduar që pas 5 nëntorit kur PDK-ja e pësoi një goditje të madhe, dhe kjo goditje erdhi nga Gjykata Speciale që ne si PDK çka do të bëjmë është do dorëzohemi. Por ju e dini që një parti që ka dal prej luftës, një parti që ka shtrat UÇK-në, e cila është e themeluar prej të burgosurve politik, e prej intelektualeve, nuk e ngriti flamurin e bardhë dhe të dorëzimit, në situatat e goditjes. Dhe ky tregim po tregon sot këtu që i madh e i vogël, anëtarë të PDK-së, qytetarë të Kosovës, për shkak të kryetarit tonë Kadri Veselit, për shkak të Hashim Thaçit, për shkak të UÇK-së. Për shkak të goditjes që morëm e kanë kthyer kudo në Vushtrri, Mitrovicë, Skenderaj, Drenas, e kudo në Kosovë, dhimbjen dhe goditjen në vullnet të ri politik, në mbështetje të re politike”, tha ai.
Hoxhaj vushtrriasve u bëri thirrje që të dielën më 14 shkurt të dalin dhe të votojnë PDK-në, pasi sipas tij duke votuar këtë parti, votojnë për UCK-në, Hashim Thaçin e Kadri Veselin të cilët padrejtësisht po mbahen në Hagë.
Hoxhaj: Votoni për PDK-në nëse doni të keni qeveri për 4 vjet
(Video)
“Juve si qytetarë të Vushtrrisë ju ftoj që atë ditë kur të dilni dhe të votoni për deputetët tuaj, për PDK-në, atë ditë kur të dilni të votoni për PDK-në dhe numrin 134, aty e keni edhe UÇK-në edhe PDK-në, edhe Hashim Thaçin dhe Kadri Veselin. Prandaj në këto zgjedhje nuk ka një subjekt politik i cili shkon më mirë organizuar, me program të qartë, me vizion të qartë dhe ne e dimë se çka do të bëjmë në javën e parë, në muajin e parë, në vitin e parë dhe në çdo vit. Qytetarët e Kosovës duhet ta kuptojnë një gjë. Ata të cilët në vjeshtën e 2019-së kanë votuar për një koalicion të shpresës që ka qenë koalicion i gënjeshtrave, i rrenave, i mashtrimeve dhe populizmit, duhet ta din se kësaj radhe duhet të votojnë për PDK-në nëse duan të kenë qeveri për 4 vjet, për të tjerët mund të keni qeveri për 50 ditë”, tha ai.
E pas 14 shkurtit, Hoxhaj tha se PDK-ja do të përmirësojë gjendjen ekonomike të shkaktuar nga pandemia, por edhe do të rrisë mirëqenien e qytetarëve.
Hoxhaj: Rritja ekonomike është prioritet për neve si PDK
(Video)
“Ne do të bëjmë atë që PDK çdo herë e ka bërë. do ta ngrisim mirëqenien e qytetarit, zhvillimin ekonomik, krijimin e vendeve të reja të punës. Rritja ekonomike është prioritet për neve si PDK, për shkak të faktit se pandemia e ka goditur vërtet me të madhe ekonominë e vendit dhe për shkak të faktin se qytetarët e Kosovës çdo ditë e më shumë po varfërohen. Ata e din që PDK i besojnë për temë të zhvillimit ekonomik. Ata din që sa herë PDK-ja ka marrë vendime e ka quar vendin përpara dhe ata e din se nëse ka një parti politike e cila është në gjendje të marrë vendime është PDK-ja.”, përfundoi Hoxhaj./KosovaPress