Kryetari i Partisë Demokratike të Kosovës (PDK), Enver Hoxhaj tha sot se pret nga Qeveria e Kosovës që të menaxhojë sa më mirë me pandeminë në mënyrë që kjo çështje të marrë drejtimin e duhur.
Këto komente Hoxhaj i bëri pas takimit me Myftiun Naim Tërnava, gjatë vizitës në Bashkësinë Islame të Kosovës (BIK), prej ku ka uruar muajin e shenjtë të Ramazanit duke u dëshiruar agjërim sa më të lehtë të gjithë qytetarëve të besimit islam.
Ai shprehu bindjen e tij se qytetarët do të respektojnë masat anti-COVID edhe gjatë këtij muaji.
Hoxhaj: Presim që qeveria të menaxhojë sa më mirë me pandeminë
“Ky muaj i shenjtë ndodh në një kohë pandemie, ku realisht në Kosovë por edhe përtej, e bënë të vështirë edhe funksionimin e çdo familjeje dhe shoqërisë edhe në kontekstin e muajit të shenjtë të Ramazanit. Ne shpresojmë që qytetarët do t’i respektojnë masat gjatë kësaj kohe meqë shëndeti i tyre është i rëndësishëm. Shpresojmë që së shpejti kjo temë do ët merr drejtimin e duhur përmes menaxhimit që presim të ndodhë nga Qeveria e Kosovës”, tha ai.
Myftiu Naim Tërnava shprehu mirënjohje ndaj Hoxhajt për vizitën e sotme, teksa bëri të ditur se kanë biseduar edhe për mundësitë e bashkëpunimit për një të ardhme sa më të mirë të vendit.
Tërnava: Biseduam për një të ardhme sa më të mirë të vendit tonë
“Shfrytëzuam rastin që të bisedojmë edhe për gjendjen aktuale, e cila mbretëron në Kosovë sa i përket virusit COVID-19, dhe biseduam për mundësitë e bashkëpunimit për një të ardhme sa më të mirë të vendit tonë”, tha Tërnava.
Myftiu Tërnava i është drejtuar qytetarëve të vendit me një mesazh urimi gjatë ditës së sotme, duke u dëshiruar të gjithë besimtarëve myslimanë agjërim të lehtë dhe të pranuar gjatë muajit të shenjtë të Ramazanit./N.Jakupi/KP