Në kuadër të 13-vjetorit të pavarësisë së Kosovës, të martën është hapur ekspozita e fotografisë “Kujtesa e Kosovës rambouillet” e reporterit Asllan Krasniqi, fotografi të cilat rrëfejnë momente nga konferenca e Rambujesë.
Me këtë rast, u vlerësua se autori i fotografive ka arritur të shpjegoj me shumë mjeshtëri atë që ndodhi në Konferencën e Rambujesë. Nga folësit u vlerësua se Asllan Krasniqi ka dokumentuar më së miri historinë e dhimbshme dhe atë të lavdishme të Kosovës.
Drejtori i Bibliotekës Kombëtare, Fazli Gajraku, tha se fotografitë e Asllan Krasniqit paraqesin ngjarjet më të dhimbshme të historisë së Kosovës.
Ai theksoi se është nder që fotografitë e sotme, të papublikuara më parë, po ekspozohen për të parën herë në Bibliotekën Kombëtare.
Gajraku: Asllan Krasniqi ka dokumentuar më së miri historinë e dhimbshme dhe të lavdishme të Kosovës
Video
“Po flasim për një fotoreporter që ka dokumentu më mirë se çdo kush tjetër historinë e dhimbshme të Kosovës, historinë e lavdishme të saj, sepse të gjitha ngjarjet që i kanë ndodhur të dhimbshme dhe të gëzueshme të Kosovës, Asllan Krasniqi ka qenë aty dhe e ka dokumentu përmes fotografisë gjithë këtë histori të Kosovës. Për Bibliotekën Kombëtare ka qenë nder i madh ky lloj bashkëpunimi me fotografin Asllan Krasniqi dhe ne jemi të nderuar që kjo ekspozitë po hapet për përvjetorin e pavarësisë së Kosovës, për të parë vizitorët pamje që nuk janë parë kështu siç janë”, tha ai.
Zëvendësministri në detyrë i Kulturës Rinisë dhe Sportit, Engelbert Zefaj, tha se përmes fotografive të publikuara sot nga fotoreporteri Asllan Krasniqi pasqyrohet rruga e përshkuar deri ën pavarësinë e Kosovës.
Sipas tij, kjo ekspozitë tregon momente shumë të rëndësishme dhe tregon se çfarë ka ndodhur në Konferencën e Ramubjesë.
Zefaj: Ekspozita e sotme shpjegon atë që ndodhi në Rambuje
Video
“Kjo ekspozitë po flet shumë, po arrin të shpjegojë atë që ndodhi ato ditë në Rambuje. Ajo që po më bënë përshtypje është që kamera e z. Krasniqi ka arritur aq afër, jam i bindur që përveç kamerës, edhe veshi i z. Krasniqi ka qenë aq afër dhe ka dëgju se çka po ndodh në ato hapësira, në ato korridore, ku është diskutuar për çështjen e Kosovës. Z. Krasniqi ka edhe shumëçka për të treguar përveç fotografive, për të treguar çfarë ka ndodhur”, u shpreh ai.
Ndërsa autori i fotografive, Asllan Krasniqi, tha se ndjehet krenar që ka pasur rastin të bëjë këto fotografi në një periudhë shumë të rëndësishme për të ardhmen e vendit, fotografi, të cilat i ekspozoi me rastin e 13 vjetorit të shpalljes së pavarësisë.
Krasniqi: Këto fotografi nuk i ka parë askush, i kam ruajtur për një vend si këtu
Video
“Jam shumë i emocionuar sepse ndihem krenar që jam në mesin tuaj, ndihem krenar që kam pasur fatin me i fotografi këto personalitete dhe dua t’iu falënderoj jashtë mase, bibliotekën, drejtorin, për ftesën dhe përzgjedhjen e këtyre fotografive që unë i kam ruajtur me xhelozi për një vend si këtu. Askund këto fotografi nuk janë ekspozuar, askush nuk i ka parë, i kam ruajtur për një vend si këtu”, u shpreh ai.
I pranishëm në ceremoninë e hapjes së ekspozitës ishte edhe regjisori Dibran Fylli, i cili në një fjalë rasti tha se autori Asllan Krasniqi ka mbi 1 milion fotografi, përmes së cilës rrëfen gëzim e dhimbje.
Para 22 viteve, më 6 shkurt të vitit 1999 i filloi punimet Konferenca e Rambujesë. Ky takim, i cili u mbajt në afërsi të Parisit të Francës, synoi zgjidhjen e krizës në Kosovë./N.Jakupi/KosovaPress