Deputeti i Partisë Demokratike të Kosovës (PDK) Xhavit Haliti ka kërkuar nga kryeministri i Shqipërisë Edi Rama hapjen e qendrave të vaksinimit për qytetarët e Kosovës për shkak të gjendjes së rëndë me pandemi.
Haliti në një postim në Facebook ka shkruar se hapja e qendrave të vaksinimit për qytetarët e Kosovës do të ishte një veprim i domosdoshëm në një kohë të vështirë me të cilën po përballet vendi.
“Vepro sa më shpejt si me rastin e punëtorëve shëndetësorë të Kosovës, për të shpëtuar jetë njerëzish. Unë dua të vaksinohem me cilëndo vaksinë që janë duke u vaksionuar bashkëkombësit e mi në Shqipëri. E, si unë janë shumë në Kosovë. Kryeministër na ndihmo të lutem që ta kalojmë edhe këtë sfidë që e ka goditur njerëzimin”, ka thënë ai.
Postimi i plotë:
Thirrje publike kryeministrit shqiptar, Edi Rama
Vëlla i dashur Edi, kryeministër i Shqipërisë, marrë parasysh gjendjen e rëndë në Kosovë me pandeminë COVID-19, dhe në anën tjetër, neglizhencën e institucioneve të vendit për të siguruar vaksinën, të bëjë thirrje që të hapni disa qendra vaksinimi për të gjithë qytetarët e Kosovës.
Ky veprim do të ishte i mirëpritur dhe i domosdoshëm në këtë kohë të ligë.
Prandaj, vepro sa më shpejt si me rastin e punëtorëve shëndetësorë të Kosovës, për të shpëtuar jetë njerëzish.
Unë dua të vaksinohem me cilëndo vaksinë që janë duke u vaksionuar bashkëkombasit e mi në Shqipëri. E, si unë janë shumë në Kosovë.
Kryeministër, na ndihmo të lutem që ta kalojmë edhe këtë sfidë që e ka goditur njerëzimin!
Ndryshe, Kosova në fund të muajit mars mori 24 mijë doza të AstraZeneca, duke qenë vendi i fundit në Evropë që nuk kishte nisur ende vaksinimin kundër COVID-19. Kontingjenti i dytë i vaksinave sipas Institutit Kombëtar të Shëndetit Publik do të ketë 108 mijë doza dhe pritet të arrijë brenda disa javësh.
Autoritetet kosovare kanë miratuar një Plan të vaksinimit i cili është i ndarë në tri faza.
Në fazën e parë, sipas këtij plani do të vaksinohen grupet me rrezik të lartë ku përfshihen punëtorët shëndetësorë, banorët dhe punëtorët shëndetësorë të shtëpive të kujdesit për të moshuarit, grup-moshat 80+ dhe një pjesë e popullsisë me sëmundje kronike (persona në dializë, persona me diabet, sëmundje kardiovaskulare).
Në këtë grup, numri i përgjithshëm i personave llogaritet të jetë 54.000 mijë apo 3 për qind e popullsisë së përgjithshme të Kosovës.
Faza e dytë përfshihen grup-moshat 65-79 vjeç, popullsia e mbetur me sëmundje kronike, mësimdhënësit dhe forcat e sigurisë që janë të përfshira në menaxhimin e pandemisë COVID-19. Ky grup përbëhet nga 306.000 persona apo 17 për qind e popullsisë.
Për fazën e parë dhe të dytë do të përdoren vaksinat që Kosova do të marrë nga programi COVAX. Ndërkaq, për fazën e tretë parashihet të bëhet vaksinimi i 50 për qind të popullsisë në mënyrë që të arrijë 900.000 persona ose 70 % qind e mbulimit të përgjithshëm të popullsisë me vaksinën kundërCOVID-19./KP