Traumat që vijnë nga mjediset familjare dhe shoqërore, kushtet e jetesës, rrethanat ekonomike, e depresioni shpesh janë vlerësuar shkaktarë që kanë çuar drejt vetëvrasje e tentimit për ta kryer këtë akt. Nuk janë të rralla rastet kur gratë kanë tentuar t’i bëjnë vetes keq si pasojë e mosmarrëveshjeve në familje, raporton Gazeta Sinjali.
Një rast i tillë dyshohet se ka ndodhur të shtunën në orët e mbrëmjes, në Fushë Kosovë, ku një grua e moshës 35-vjeçare kishte konsumuar sasi të madhe të medikamenteve dhe për pasojë iu ishte përkeqësuar gjendja shëndetësore.
Për shkak të gjendjes serioze, viktima ishte dërguar në Qendrën Klinike Universitare të Kosovës për të marrë trajtim mjekësor, prej ku edhe Policia u njoftua për rastin. Burimet nga Emergjenca kanë bërë me dije për Sinjalin se viktima dyshohet se ka pasur dhunë psikike të vazhdueshme nga bashkëshorti i saj pas një konflikti mes tyre.
Me të marrë informacionet e para për rastin, Policia ka shoqëruar të dyshuarin për një stacion policor, ku është intervistuar nga hetuesit për dyshimet e ngritura ndaj tij dhe më pas me urdhër të Prokurorit të Shtetit është iniciuar rasti “Dhunë në familje”.