Edhe një konferencë statusore. Procesi ende në procedurën paraprake. Edhe më shumë përplasje. Por, nisja e gjykimit nuk po shihet në horizont në rastin ku po gjykohen Hashim Thaçi, Kadri Veseli, Rexhep Selimi e Jakup Krasniqi. Gazeta Nacionale sjell një përmbledhje të asaj se çfarë u tha në seancën e sotme në rastin e krerëve të UÇK-së.
Bashkëpunimi me UDB-në e Serbisë. Fshehja e provave shfajësuese e deri te vonesat e tepruara të nisjes së gjykimit. Këto kanë qenë shqetësimet kryresore që i kanë ngritur avokatët e Thaçit, Veselit, Krasniqit e Selimit, në konferencën e radhës statusore që u zhvillua në Dhomat e Specializuara të Hagës.
Por, t’i shkojmë me radhë! Fillimisht avokati i Kadri Veselit, kërkoi që ish-kryeparlamentari i Kosovës të largohet nga seanca, pasi ka një telefonatë me fëmijët e tij e të cilën e ka aranzhuar qysh më herët. Pas kësaj, nisën deklarimet.
Gregory Keohe, avokat i Hashim Thaçit ngriti alarmin qysh në nisje të seancës. Ai tha se Prokuroria e Specializuar në Hagë, po merr dokumentacione fshehurazi nga UDB-ja e Serbisë.
“ZPS-ja po ka të bëjë me shërbimin e fshehtë serbë nga i cili ka marrë shumë materiale, ka dëgjuar dhe ka marr shumë akuza që sigurisht që nuk e gjetën rrugën deri në aktakuzë, që bashkëpunojnë me Rusinë, siç po ndodh në Ukrainë por kjo është një gjë tjetër. Siç thashë po merr prova materiale nga serbët që padyshim do ta cenojnë kredibilitetin e ZPS-së”, tha Keohe. Alarmin për marrjen e dokumenteve nga Serbia, e ngriti edhe avokati i Kadri Veselit, Ben Emmerson.
Avokati i Thaçit përmendi edhe raportet e Shteteve të Bashkuara të Amerikës menjëherë pas luftës, të cilat theksojnë se Ushtria Çlirimtare e Kosovës nuk është marrë me operacione terroriste e narkotike, siç sipas tij, pretendon Prokuroria e Specializuar.
Fshehja e provave shfajësuese
Në seancën e fundit u përmend fshehja e deklaratës së Dan Everts e Bujar Bukoshit, të cilët e kishin vlerësuar UÇK-në si ushtri për çlirim. E akuzat për fshehjen e provave të tilla vazhduan edhe gjatë seancës së sotme.
“Prova të rrejshme përfshirë torturën, shtantazhin. Të gjitha provat shfajësuese duhet të ishin përfshirë. Ka prova të forcave serbe në terren në kosovë, që kanë kryer krime me qëllim që t’i manipulojnë provat e ta fajësojnë UCK-në. Ka dicka që nuk shkon këtu”, deklaroi Ben Emmerson, avokat i Kadri Veselit. Akuza të tilla, bënë edhe avokatët e Rexhep Selimit e Jakup Krasniqit.
“Kemi shqetësime të rënda për qëndrimin e Prokurorisë për materialin shfajësues. Ky material ka të bëj me pafajësinë e të akuzuarve dhe mund ta ndryshojë tërësisht pistën e hetimit dhe cështjen gjyqësore. Duhet ta analizojmë ato që ka argumentuar Prokuroria. Pse nuk i njerrin ato mbi 2 mijë dokumente që tani. Edhe pse e kanë finalizuar për 70% të materialeve, thanë që nuk e nxjerrim tani, që është shkelje”, u shpreh David Young, mbrojtës i Rexhep Selimit.
Një përgjigje për gjitha këto kritika, e pati Valeria Bolici e cila mori përgjegjësinë të flistë në emër të Zyrës së Prokurorit të Specializuar. Ajo tha se kjo prokurori, po e kryen punën e vetë sipas obligimeve që i ka marrë. Madje, ofroi disa statistika, të cilave nuk iu besuan avokatët.
“12 prej kërkesave të mbrojtjes i kemi përfunduar. 75% e të tjerave janë të përmbushura. Kemi pasur mungesa në staf si rezultat i Koronavirusit dhe kemi pasur kufizime. Varet shumë edhe nga madhësia, kohëzgjatja, sasia e provave. I kemi bërë më shumë se 70% të rishikimit, pra 2 mijë e 500 prova me përmbajtje shfajësuese. Mbrojtja po na akuzon pa fakte dhe nuk janë aspak konstruktiv”, deklaroi Valeria Bolici nga Zyra e Prokurorit të Specializuar.
Hetimet që “shpërthyen” debatin e vërtetë
Edhe në këtë seancë, më të zëshmit dolën avokatët e Kadri Veselit e Hashim Thaçit. Akuzat e debate shpërtheu kur Prokuroria e Specializuar theksoi se po i vazhdojnë hetimet. Sipas mbrojtjes, gjykata duhet t’ia jap një afat përfundimtar ZPS-së, dhe kjo e fundit ta dorëzojë dosjen finale. Në të kundërtën, edhe hetimet e avokatëve bëhen pothuajse të pamundura.
“Për çka janë angazhuar ata? Standardi është a janë ata të gatshëm ta transferojnë çështjen përpara trupit gjykues. Duket se janë ende duke hetuar. Çështja që duhet të hetojnë është aktakuza që kemi përpara, ata po përpiqen të nxjerrin informacione përveç atij malit që na e kanë dhënë. Këtij hetimi duhet t’i vie fundi. Nëse do të ishte prokurori që ka zbatuar afatet do të ishte ndryshe, por kjo prokurori iu ka keqinformuar që nga fillimi. Gjykimi duhet të fillojë vitin që shkoi thonin ata. Prokurori ngrihet thotë se duhet të na jepni udhëzime. Po e zgjasin e po e zgjasin, mbylleni më këtë punë”, u shpreh i acaruar Gregory Keohe, avokat i Hashim Thaçit.
Njëjtë i zëshëm ishte Ben Emmerson. Madje, avokati i Veselit tha se me vonesat e Prokurorisë, gjykimi vështirë se do të fillojë në vitin 2022. Këtë, e mbështeti në disa argumente.
“Ne kemi marrë prova të sasive që nuk janë parë në asnjë çështje tjetër të gjykatave ndërkombëtare. Duhet të përcaktojmë një afat. Ky është fundi. Ta bëjmë këtë diskutim në mars 2022 rreth faktit se kur prokuroria të jap dosjen e vetë ose kur përfundojnë hetimet e veta, kjo është problematike. Mendoj se problemi kryesor është vendimi i z.Smith që kishte vendosur të arrestoheshin këta persona, përderisa ishin hetimet në fazën fillestare. Çdo prokuror i ndershëm dhe profesional që kam hasur në arenën ndërkombëtare do të kishte bërë këtë punë para se t’i ndalonte të akuzuarit. Është shumë e vështirë të kemi një çështje në vitin 2022. Kemi një klient në paraburgim dhe që sheh gjykim deri në 10 vjet, kjo nuk duhet të ndodhë”, ka thënë avokati Ben Emmerson.
Një lajm krejt në fund të seancës e dha edhe prokurori James Pache. Ai tha se kanë vendosur të zvogëlojnë numrin e orëve për marrjen në pyetje të dëshmitarëve, dhe në përgjethsi gjithë procesit që synohet të zhvillohet.
Hashim Thaçi, Kadri Veseli, Jakup Krasniqi dhe Rexhep Selimi u arrestuan në nëntorin e vitit 2020. Tash e më shumë se një vit, ata po mbahen të paraburgosur në Hagë.
Procesi ende është në fazën paraprake. Kurse, pothuajse secila ankesë e avokatëve rrëzohet nga gjyqtari i procedurës ose panelet e Apelit./Nacionale