Kryeministri i Kosovës Albin Kurti ka emëruar Getoar Mjekun, në pozitën e zëvendësministrit të Industrisë, Ndërmarrësisë dhe Tregtisë.
Lajmi është bërë i ditur nga vetë Mjeku, nëpërmjet rrjetit social Instagram.
Getoar Mjeku është jurist dhe publicist i cili i ka mbaruar studimet katërvjeçare, me lëvdata të larta, programi i nderit i Universitetit “Texas Lutheran” 2010, për të vazhduar si Juris Doctor me lëvdata Universiteti “Southern Methodist” Dallas në vitin 2014. Ka mbaruar edhe programe arsimore në Washington, Oxford të Anglisë dhe Kostarikë.
Ai është kthyer në Kosovë pas 10 vjetësh në Amerikë, duke punuar si këshilltar juridik me organizata të zhvillimit ndërkombëtar dhe institucione e ndërmarrje publike, duke përfshirë Agjencinë e Privatizimit dhe Telekomin e Kosovës.
Ndryshe, deri më tani që prej formimit të qeverisë, Kurti ka përzgjedhur pesë zëvendësministra. Përveç Getoar Mjekut, në pozitën e zëvendësministrave janë vendosur Hysen Durmishi (Ministria e Mjedisit, Planifikimit Hapësinor dhe Infrastrukturës), Enver Dugolli (Ministria e Mbrojtjes), Blerim Sallahu (Ministria e Drejtësisë) dhe Ilir Aliu (Ministria e Financave, Punës dhe Transfereve)./KP