Një person është arrestuar sot pasdite në fshatin Damjan të komunës së Gjakovës, pasi i njëjti dyshohet se ka sulmuar fizikisht një fëmijë, raporton Gazeta Sinjali.
Burimet e Gazetës Sinjali bëjnë të ditur se i dyshuari ka goditur me grushte e shqelma një 12-vjeçar, me të cilin nipi i tij kishte pasur një ngatërresë në oborrin e shkollës fillore ‘Kongresi i Manastirit’.
Për shkak të sulmit, fëmija ka marrë lëndime trupore dhe si pasojë e kësaj është detyruar të kërkojë ndihmë mjekësore në spital.
Ndërkohë njësitet policore pasi kanë marrë informatën lidhur me rastin, kanë shoqëruar në stacion policor të dyshuarin, ndaj të cilit është nxjerrë aktvendim që të ndalohet për 48 orë.
Po ashtu i njëjti do të hetohet nën dyshimet për kryerjen e veprës penale ‘Lëndim i lehtë trupor”.