Se veprimet e Kurtit në veri të Kosovës nuk i kontriubojnë stabilitetit të rajonit e ka thënë sot edhe gazetari gjerman me përvojë në zhvillimet në Ballkan, Michael Martens, përmes një shkrimi në gazetën më të madhe gjermane “Frankfurter Allgemeine Zeitung”.
Kosova dhe liderët e saj ka dy javë që po qarkullojnë nëpër mediat më të mëdha të botës. Kjo pas situatës së tensionuar të krijuar në veri të vendit si rezultat i vendimit të kryeministrit Albin Kurti për t’i vendosur katër kryetarët e rinj në objektet e komunave. Shtetet e Bashkuara të Amerikës e kanë qortuar ashpër kreun e Qeverisë së Kosovës, duke kundërshtuar ashpër atë që e kanë quajtur “vendim të njëanshëm” të kryeministrit Kurti. Sekretari Blinken ka thënë se një veprim i tillë i Kurtit do të ketë pasoja edhe për raportet Kosovë-SHBA, ndërkohë që ushtria e Kosovës me vendimin e amerikanëve është përjashtuar nga “Defender Europe 2023”.
Në hyrje të këtij shkrimi, Martens potencon se pavarësisht dhunës së vazhdueshme në veri të Kosovës, vendimet e kryeministrit Albin Kurti janë në një linjë me planet e Serbisë për destabilizim të rajonit të Ballkanit Perëndimor.
“Dhuna është konstante në veri të Kosovës. Megjithatë, politikat e kryeministrit të Kosovës Kurti janë në përputhje me planet serbe për destabilizimin e rajonit”, shkruan në tekstin e botuar sot në Frankfurter Allgemeine Zeitung transmeton Gazeta Express.
Martens tutje potencon se një konflikt në rajonin e Evropës Juglindore është gjëja e fundit që i duhet Perëndimit momentalisht.
“Një konflikt i ri në oborrin e Evropës Juglindore është gjëja e fundit që i duhet Perëndimit tani”, thuhet tutje në tekstin e FAZ, trasnmeton Express.
Teksti i Martens mban titullin “Kush po bën faull (lojë të gabuar) në Kosovë” dhe është publikuar sot në gazetën më të madhe të Gjermanisë, Frankfurter Allgemeine Zeitung./Gazeta Metro