Përfaqësuesit e Serbisë dhe përfaqësuesit politikë të serbëve të Kosovës e kanë interpretuar më ndryshe pajtimin për udhërrëfyesin për zbatimin e marrëveshjes për energjinë.
Ata kanë mirëpritur marrëveshjen, duke thënë se marrëveshje ruan autonomin në furnizimin e veriut me energji elektrike.
Sipas tyre, kjo marrëveshje hap rrugën për bisedime për formimin e asociacionit të komunave me shumicë serbe, bisedime këto që deri me tani i ka refuzuar Qeveria i Kosovës.
“Pa tarifë retroaktive. Rrugë e hapur për bisedime për Asociacionin e Komunave me shumicë serbe. Unë personalisht do të jem në terren me njerëzit tanë dhe do të monitoroj zbatimin e marrëveshjes”, ka shkruar në llogarinë e tij në “Twitter”, kryenegociatori i Serbisë për bisedime me Kosovën, Petar Petkoviq.
Të njëjtën gjë e ka thënë edhe subjekti politik serb, Lista Serbe.
Përmes një njoftimin të publikuar në faqen e tyre në “Facebook”, ky subjekt politik ka përmendur edhe përfitimet tjera, duke shtuar se marrëveshja e sotme ka forcuar drejtpërdrejt marrëveshjet e mëparshme nga viti 2013 dhe 2015.
“Theksojmë se do të punësohen të gjithë punëtorët e Elektrokosmetit në veri, si dhe planifikohet rekrutimi i punëtorëve të rinj në kompaninë e re, e me këtë edhe mbijetesa dhe qëndrimi në këto zona. Veçanërisht duhet theksuar se marrëveshja e sotme ka forcuar më drejtpërdrejt marrëveshjet e mëparshme nga viti 2013 dhe 2015, dhe në të njëjtën kohë ka hapur rrugën për biseda për Bashkësinë e Komunave Serbe”, është thënë në njoftimin e Listës Serbe.
Sipas tyre, kjo marrëveshje u mundëson serbëve në veri të punësohen dhe të mos paguajnë në mënyrë retroaktive shpenzimet e energjisë elektrike.
“Duhet të theksohet se kjo marrëveshje është provë që dialogu është rruga e vetme për të zgjidhur çështjet e hapura dhe jo përdorimi i dhunës, dhe kjo marrëveshje parandalon marrjen potenciale me brutalitet të stacionit të Valaq-it, rrëmbimit të sistemit tonë të energjisë dhe ndërhyrjes së furnizimit me energji të qytetarëve tanë, institucioneve edhe entiteteve ekonomike në këtë kohë të krizave dhe sfidave të mëdha”, është thënë në njoftimin e Listës Serbe.
Kryeministri i Kosovës, Albin Kurti, vazhdimisht ka mohuar çfarëdo mundësi të bisedimeve për formimin e Asociacionit të komunave me shumicë serbe.
Ditë me parë, Raportuesja në Parlamentin Evropian, Viola von Cramon, ka deklaruar se Qeveria e Kosovës ka një propozim për çështjen e asociacionit.
Mirëpo, kryeministri i Kosovës, Albin Kurti, ka mohuar këto pretendime, duke shtuar se nuk është në dijeni për ndonjë plan për asociacionin e komunave me shumicë serbe.
“Kosova e ka asociacionin e komunave. Mua si kryeministër mjaft po më del ky asociacion. Unë nuk jam në dijeni për ndonjë plan për asociacion të komunave me shumicë serbe. Kushtetuta nuk toleron asociacion mbi baza etnike. Dhe mos të harrojmë që nëse pyesni qytetarët e Kosovës, askush nuk e ka prioritet një asociacion të tillë, duan zhvillim dhe arsim”, ka thënë ai.
Për çka u pajtuan sot Kosova dhe Serbia
Delegacionet e Kosovës dhe Serbisë sot janë pajtuar në Bruksel për zbatimin e marrëveshjes për energjinë, e cila parasheh se qytetarët e katër komunave me shumicë serbe në veri të Kosovës, do të fillojë faturimi i rrymës së shpenzuar.
Kryenegociatori i Kosovës në dialogun me Serbinë, Besnik Bislimi, ka thënë se faturimi do të bëhet sipas ligjeve të Kosovës.
“Ky udhërrëfyes do të mundësojë faturimin e energjisë në katër komunat në veri të Kosovës, sipas ligjeve dhe sistemit rregullator të Kosovës.”, ka shkruar Bislimi në “Twitter”.
Sipas këtij udhërrëfyesi, parashihet që Zyra e Rregullatorit për Energji e Kosovës(ZRRE), t’i lëshojë licencë për furnizim kompanisë nga veriu, Elektrosever, në përputhje me kornizën ligjore dhe rregullative të Kosovës.
Lehtësues në zbatimin e marrëveshjes së arritur në vitin 2013, do të jetë Bashkimi Evropian.
Kur partia në pushtet, LV-ja ishte në opozitë e kishte kundërshtuar këtë marrëveshje. Madje, në vitin 2015, LV-ja kishte vlerësuar se “Zbatimi i kësaj marrëveshjeje legalizon ndërhyrjen e plotë të Serbisë brenda sistemit energjetik të Kosovës”. /Nacionale