Mbrëmë rreth orës 05:00 në rrugët ‘Knjaza Milosa’, ‘Kralja Petar’, ‘Lola Ribara’ dhe ‘Kolasinska’ në veri të Mitrovicës janë vendosur mbishkrime kundër targave të Republikës së Kosovës, raporton Gazeta Sinjali.
Sinjalizuesi i Gazetës Sinjali për veriun e vendit ka bërë të ditur se në automjetet e parkuara janë vendosur fletushka me mbishkrime se qytetarët serbë do vazhdojnë t’i mbajnë targat KM.
Në fletushka janë të paraqitura gjashtë pika të cilat ‘arsyetojnë’ refuzimin e qytetarëve serb për t’i riregjistruar veturat e tyre me targa RKS.
Aty thuhet se regjistrimi në targa KM duhet të bëhet sepse:
Janë serbe;
Regjistrimi është më i lirë me targat KM;
Nuk ka shpenzime shtesë;
Mund të udhëtosh normalisht;
E gjithë bota i njeh targat KM;
Veturën mund ta tjetërsosh dhe ta shesësh.
Qeveria e Kosovës ka marrë vendim që veturat me targa të qyteteve në Kosovë, të cilat ende lëshohen nga autoritetet serbe, do të mund të zëvendësohen me targa RKS nga 1 gushti deri më 30 shtator.
Kryeministri, Albin Kurti, u ka bërë thirrje qytetarëve të komunitetit serb që t’i përgjigjen pozitivisht procesit të riregjistrimit të veturave me targa RKS (Republika e Kosovës).
Kurti shpjegoi se riregjistrimi i automjeteve do të jetë i mundur në një nga 33 qendrat e regjistrimit në mbarë Kosovën, duke përfshirë edhe komunat në veri.
Sipas vendimit të Qeverisë, riregjistrimi i targave RKS do të vlejë për të gjitha automjetet e regjistruara në sistemin serb nga 10 qershori i vitit 1999 deri më 21 prill të 2022.
Pas afatit nuk do të mund të bëhet riregjistrimi i veturave me targa të qyteteve të Kosovës të lëshuara nga Serbia.
Nga ana tjetër, drejtori i të ashtuquajturës Zyra për Kosovën në Qeverinë e Serbisë, Petar Petkoviq, i tha kryeministrit të Kosovës, Albin Kurti, se targat serbe në Kosovë nuk janë të paligjshme, por se ekzistojnë në bazë të ligjeve të Serbisë dhe Marrëveshjes së Brukselit.
Beogradi zyrtar reagoi ashpër ndaj vendimit të Qeverisë kosovare për caktimin e afatit për riregjistrimin e veturave.
Vlerësohet se në veri të Kosovës janë rreth 10,000 vetura me targa KM, të cilat janë lëshuar nga Zyra serbe e Policisë për Mitrovicën, me seli në Rashkë, qytet në Serbi.