Tri ditë më parë u shënua përvjetori i 23-të i njërës prej masakrave më të mëdha në Kosovë. Në Izbicë të Skënderajt u vranë 147 civilë shqiptarë, në mesin e tyre të moshuar e fëmijë. Në kohën kur kujtimet e familjarëve shtohen, Prokuroria Speciale ngriti aktakuzë ndaj Muhamet Alidemajt, shqiptarit që dyshohet se u përfshi në kryerjen e kësaj masakre makabre. Gazeta Nacionale ka siguruar aktakuzën e plotë dhe sjell detaje.
Muhamet Alidemaj nga fshati Kërrninë e komunës së Istogut, gjatë periudhës mars-qershor 1999, ishte bërë pjesë e forcave policore dhe ushtarake serbe. Në këtë cilësi, ai nga Prokuroria Speciale e Kosovës po akuzohet se ka marrë pjesë në kryerjen e masakrës së Izbicës, që vlerësohet si një nga krimet më të mëdha të sistemit serb në Kosovë.
Gazeta Nacionale ka siguruar aktakuzën ndaj Alidemajt i cili përveç se dyshohet se ka marrë pjesë në ekzekutimin e rreth 130 personave duke i qëlluar me armë automatike, dyshohet edhe për zhvarrosjen e trupave dhe largimin e tyre me kamionë në drejtime të panjohura.
“I pandehuri së bashku me forcat ushtarake dhe policore serbe në të cilën bënin pjesë edhe Ivo Obradoviq, Stanoje Sherkiq, Sasha Vidiq, Milenko Miletiq, Sava Sherkiq, Ranko Shkerkiq, Bogojlub Miletiq, Ivica Vidiq, Bane Shkerkiq si dhe persona të tjerë të paidentifikuar, fillimisht kanë zbritur nga mali dhe janë nisur në drejtim të fshatit Izbicë. Pastaj, rreth orës 10:00 shkuan në shtëpinë e Xhemile Osmanajt me ç’rast i pandehuri e plaçkit të dëmtuarën Xhemile duke i marrë para në shumën prej 1000 markave gjermane dhe duke i vënë zjarrin pasurisë së saj. Pastaj i pandehuri së bashku me pjesëtarët e tjerë të forcave policore dhe ushtarake serbe, shkojnë tek vendi – livadhi ku ishin të grumbulluar popullsia civile e fshatit Izbicë dhe fshatrave të tjera përreth. Me dhunë i ndajnë gratë nga fëmijët nën moshën 12 vjeçare dhe dhunshëm i detyrojnë që të shkojnë në drejtim të Shqipërisë. Ndërsa burrat e mbetur i ndajnë në tri grupe, duke i dërguar secilin grup në një vend të caktuar, dhe duke i ekzekutuar me armë automatike, duke i vrarë 130 persona prej të cilëve 14 viktima u identifikuan”, thuhet në pikën 1 të aktakuzës.
Trupat e zhvarrosur nga Alidemaj dhe forcat tjera serbe, i fshehën në Batajnicë të Serbisë, në Suhodoll të Mitrovicë e Novolan të Vushtrrisë.
“Në vendin e njëjtë, përafërsisht pas 2 muajve të vitit 1999, i pandehuri së bashku me pjesëtarët e tjerë të forcave policore dhe ushtarake serbe u kthyen sërish në fshat. I zhvarrosën trupat me eskavator dhe i larguan duke i transportuar me disa kamionë në drejtime të panjohura, ndërsa pas përfundimit të luftës trupat e viktimave u gjetën në varreza massive në Batajnicë të Serbisë, në fshatin Suhodoll të Mitrovicës dhe në fshatin Novolan të Vushtrrisë”, pretendon Prokuroria në pikën 2 të aktakuzës.
Muhamet Alidemaj në pikën e fundit të aktakuzës, akuzohet edhe për grabitje, dëmtim të pasurisë e rrahje e dhunë fizike e psikike.
“Në datën, kohën dhe vendin e njëjtë, i pandehuri bashkë me forcat serbe, ka marrë pjesë në trajtimin çnjerëzor, cenimin e integritetit trupor dhe të shëndetit, zhvendosje, grabitje dhe shkatërrim të pasurisë së popullsisë civile në Izbicë dhe fshatrave përreth. Fillimisht i detyruan me dhunë civilët shqiptarë që të largoheshin nga shtëpitë e tyre duke i kërcënuar me armë dhe i grumbulluan në një livadh në mes të fshatit, me ç’rast i pandehuri së bashku me disa persona të tjerë, e thirrën të dëmtuarën Xhemile Osmanaj që të dalë nga turma e njerëzve ku ishin grumbulluar. Fillimisht nën kërcënimin e armës ia morën 1000 marka gjermane, pastaj nën tytën e armës në shpinë, e detyruan që t’u prijë gjatë kontrollit të shtëpisë së saj, më pas i pandehuri Muhamet Alidemaj e goditi me shuplakë në fytyrë te dera e shtëpisë, dhe e urdhëruan që të shkoëjte turma e civilëve të grumbulluar në livadh, kurse civilëve të tjerë iu konfiskuan sendet me vlerë, i rrahën rëndë disa nga meshkujt, i detyruan gratë me dhunë të largohen në drejtim të Klinës duke u thënë të shkojnë në Shqipëri, si dhe nën kërcënimin e armëve ua grabitën çdo gjë me vlerë monetare, dhe në fund i shkatërruan shtëpitë e fshatit Izbicë”, thuhet në pikën e tretë të aktakuzës.
Me gjithë këto veprime, Muhamet Alidemaj po akuzohet se ka kryer krime lufte kundër popullësisë civile.
Si u arrestua Muhamet Alidemaj?
Policia e Kosovës më 30 mars 2021 ishte njoftuar se një person i dyshuar se ka marrë pjesë në masakrën në Izbicë, gjendej në Kosovë. Më pas si rezultat, Alidemaj u arrestua.
Alidemaj që nga përfundimi i luftës ka jetuar në Zemun të Serbisë, përderisa bashkëfshatarët e kishin menduar si të zhdukur gjatë luftës.
Shënim: Gazeta Nacionale gjatë ditës do të sjellë ekskluzivisht rrëfimet e dëshmitarëve të masakrës së Izbicës, që përshkruajnë veprimet e Muhamet Alidemajt gjatë kohës së luftës./Nacionale