Kryeministri i Kosovës, Albin Kurti ka planifikuar një skemë të re mbështetëse, për të cilën, po pretendon se do t’i ndihmojë familjet që s’e kanë asnjë anëtar të punësuar. Në fakt, ashtu siç ndodhi në vitin 2020, ky vendim do t’u dalë në ndihmë punëdhënësëve, e jo personave që do të jenë të punësuar për periudhën kohore prej gjashtë muajve. Në këtë artikull njoftojmë me rastin e Hysniut që punon si mirëmbajtës në Universitetin e Prishtinës.
Kurti të shtunën prezantoi skemën mbështetëse, siç po e quan vetë ai, përmes së cilës do të subvencionohen deri në 70 për qind të pagës bruto të punëtorit, maksimumi 300 euro, për gjashtë muaj.
Kushti i vetëm për aplikim në Zyrat e Punësimit në komunat përkatëse, është që personi të mos ketë asnjë anëtarë të familjes të punësuar.
Personat e punësuar, do t’i marrin vetëm 300 euro në muaj, me të cilat kryeministri Kurti po mendon se një familje në Kosovën tonë ku çmimet e produkteve “kanë shkuar në qiell”, mund të mbijetojë.
Përfituesit më të mëdhenj nga kjo “skemë mbështetëse”, do të jenë punëdhënësit kosovarë që edhe do t’i marrin subvencionet nga shteti.
“Pra, punëdhënësit tanë dallaverxhi do të kërkojnë prej punëtorëve të tyre të paregjistruar informacione mbi ekonomitë familjare respektive. Ata që nuk kanë familjarë tjerë të punësuar (me letra) do të regjistrohen. Sigurisht se do ta marrin të njëjtën pagë, por e mira është se do ta nënshkruajnë një kontratë. Por, manovrat s’do të ndalen këtu, ato do të shumëfishohen. Ta zëmë, ndonjë punëdhënës mund ta “pushojë” nga puna zyrtarisht ndonjë punëtor me familjarë të punësuar (pra, do ta mbajë në punë por pa kontratë) që ta “punësojë” zyrtarisht punëtorin e tij pa familjarë të punësuar. Edhe të marrë subvencionet, edhe të mos paguajë tatime shtesë.
Kush ia sheh hairin kësaj? As punëtori, as familja e tij e as shteti. Vetëm punëdhënësi abuzues.
Pra, përfitimet financiare që do të marrin punëdhënësit më të këqij të Kosovës në emër të zbutjes së varfërisë do të jenë të mëdha. Për katër punëtorë të regjistruar në atë skemë, një punëdhënës do të mund të përfitojë (po e llogarisim maksimumin e përqindjes (70) së maksimumit të pagës (300)) deri në 840 euro në muaj ose 5040 euro për gjashtë muaj. Për katërdhjetë punëtorë, shifra shkon në 50 mijë e 400 euro. Për katërqind, në 504 mijë euro. E kështu me radhë”, thuhet në opinionin e tij.
Dallaveret me 170 eurot e vitit 2020
Punëdhënësit kosovarë kishin përfituar nga shteti edhe në vitin 2020, në kohën kur qytetarët ishin izoluar për shkak të përballjes me pandeminë Covid-19.
Shumica prej tyre, atë kohë nuk punonin për shkak të mbylljes së disa veprimtarive, e kësisoji, punëdhënësit u shpërblyen me para nga shteti.
Qeveria Kurti I kishte lajmëruar për një pako mbështetëse, ku për dy muaj, parashihej ndarja e 170 eurove si mbulim i shpenzimeve të pagave mujore për punëmarrësit.
Ky vendim i Qeverisë kishte shkaktuar konfuzion te qytetarët, pasi që paratë parashihej të dilnin në xhirollogaritë e tyre, por që më pas, shefat ua ndalën atë pjesë të mjeteve në pagë mujore.
Një gjë e tillë, si shumë qytetarëve të tjerë, i ka ndodhur edhe Hysni Gashit.
Gashi, i cili punon si mirëmbajtës në Universitetin e Prishtins, “Hasan Prishtina”, për gazetën Nacionale, ka rrëfyer keqpërdorimin që i ishte bërë nga kompania kontraktuese.
Ai në detaje ka treguar se edhe pse gjatë asaj kohe nuk dilnin në punë, rektorati i UP-së kishte njoftuar kompaninë se pagesa duhet të bëhet konform kontratës.
“Mes kompanisë dhe rektoratit kam qenë si ndërmjetësues, kemi pas bisedime para 10 marsit 2020 atë kohë, nëse mundemi me i marrë nga 170 euro. E kam edhe emailin ku thuhet se edhe pse ka qenë universiteti i mbyllur, pagesa do të bëhet e plotë. Ne kemi qenë në kontakt të vazhdueshëm me të dy palët, edhe me rektoratin edhe me kompaninë kontraktuese, që është Selmans Network. Ne i kemi të gjitha dëshmitë, emailet me të dyja palët, sepse kemi dashur që të gjitha të jenë në ngjarje. Rektorati e ka njoftuar kompaninë, që edhe pse nuk ka punuar gjatë asaj kohe, edhe pse ka qenë i mbyllur rektorati, pagesa të bëhet konform kontratës, do të thotë edhe pse nuk kemi qenë në punë, pagesa duhej të nbëhet e plotë”, ka thënë Gashi për gazetën Nacionale.
Por siç tregon Gashi, drejtori i kësaj kompanie, kishte insistuar që punëtorët t’i marrin nga 170 euro, të cilat u ndanë nga Qeveria.
Kështu, në kohën kur parashihej të ekzekutohej paga për punëtorët, ai ua kishte dhënë vetëm nga 60 euro, dhe pjesën tjetër e kishte ndalë.
“Drejtori i kësaj kompanie, na ka thënë neve që unë mundem me ua mundësu juve që t’i merrni nga 170 euro, unë i thash që ne nuk jemi përfitues të asaj skeme, sepse ne i kemi pagat të garantuara, rektorati i qet pagat, e keni emailin, nuk keni nevojë të merreni me këto çështje. Ne kemi dalë disa ditë në punë, nuk kemi qenë të izoluar krejtësisht, tani çfarë ka bërë ai brenda asaj periudhes tjetër sa kemi qenë të mbyllur, e ka bërë çlajmërimin e punëtorëve dhe na kanë dalë nga 170 euro, e kur ka ardhë koha e pagës, nuk e ka qitë pagën e plotë, por i ka shtuar vetëm 60 euro, që do të thotë pjesën tjetër të pagës e ka ndalë”, ka shtuar Gashi.
Kryetari i Sindikatës së Punëtorëve Privat, Jusuf Azemi, për gazetën Nacionale ka konfirmuar se janë mijëra punëtorë që janë mashtruar në lidhje me ndarjen e këtyre mjeteve.
“Ne si sindikatë, kemi bërë edhe padi në gjykatë ndaj këtyre keqpërdorimeve”, ka thënë ai.
Reagime të ashpra ndaj Kurtit
Qytetarët e Kosovës ishin të parët që zgjodhën rrjetet sociale që t’i reagojnë Kurtit për këtë vendim, duke theksuar se 300 euro nuk mjaftojnë për një familje.
Në video mesazhin e publikuar, ku Kurti me krenari lavdërohet se kinse po u del në ndihmë familjeve që nuk kanë asnjë anëtar të punësuar, kryeminstri ka marrë komente negative nga qytetarët.
“Kurgjo hiq nuk koka kjo punë, kushti asnjë i punësuar n’familje, hajgare je tu bo valla kryeministër”, ka qenë një prej komenteve nën video mesazhin e Kurtit.
Për këtë çështje, Qeverisë i ka reaguar edhe deputeti i Partisë Demokratike të Kosovës, Bekim Haxhiu, i cili ka thënë se Qeveria po bën propozime të reja, sa herë që po procedohet në Projektligji për Trustin në Kuvend.
“Qeveri hipokritësh që paaftësinë mundohen ta shesin si vlerë. Sa herë që po procedohet Projektligji për Trustin në Kuvend, Qeveria del me propozime pa efekt në tejkalimin të krizës ekonomike”, ka shkruar ai në Facebook./Nacionale.com