Policia e Kosovës ka njoftuar se për shkak të situatës së tensionuar në veri të vendit, ku serbët lokal vendosën barrikada në rrugët që çojnë në pikat kufitare Jarinjë dhe Bërnjak, janë shënuar disa incidente, raporton Gazeta Sinjali.
Përmes raportit 24 orësh Policia ka konfirmuar se gjashtë persona janë sulmuar fizikisht, me ç’rast kanë kërkuar ndihmë mjekësore në spital.
Tre në Leposaviq e tre në Jarinjë.
Bëhet me dije se tre meshkuj kosovarë derisa po kalonin në kufi janë ndaluar nga persona të armatosur në Jarinjë.
“Tre viktimat meshkuj kosovarë, kanë raportuar se derisa kanë qenë duke lëvizur me kamion me targa vendore në drejtim të kufirit Kosovë-Serbi, janë ndaluar nga persona të armatosur me ç ‘rast janë sulmuar edhe fizikisht. Viktimat kanë pësuar lëndime trupore dhe të njëjtit kanë pranuar tretman mjekësor. Lidhur me rastin është njoftuar prokurori, rasti nën hetime”, thuhet në raport.
Edhe tre kosovarë të tjerë, një femër dhe dy meshkuj janë sulmuar nga persona të cilët kishin vendosur barikada në Leposaviq.
“Tre viktimat , dy meshkuj dhe një femër kosovar/e, kanë raportuar se derisa kanë qenë duke lëvizur me veturën me targa të huaja në drejtim të kufirit Kosovë-Serbi, janë sulmuar nga persona të dyshuar të cilët kishin vendosur barrikada. Viktimat kanë pranuar tretman mjekësor. Lidhur me rastin është njoftuar prokurori, rasti nën hetime”, njofton Policia.