E akuzoi mbrëmë, Shpejtim Bulliqi ia kthen rëndë ish-shefit të tij, Isa Mustafës

- in Lajme

Ish-kryeministri i Kosovës, Isa Mustafa, të mërkurën derisa ka folur për vonesat në procesin e liberalizimit të vizave, ka përmendur edhe dy personalitet që ai mendon se janë shkaktarë për mosliberalizim.

Presidentja Vjosa Osmani dhe Kryetari i Podujevës, Shpejtim Bulliqi, të cilët në të kaluarën ishin pjesë e LDK-së, sipas ish-bashkëpartiakut të tyre janë fajtorë pse Kosova nuk e fitoi liberalizimin e vizave.

Front Online ka kontaktuar me kryetarin e Podujevës, Shpejtim Bulliqi, lidhur me akuzat që ia ka bërë ish-shefi i tij.

Bulliqi tha se deklaratat e Isa Mustafës nuk duhet të merren për bazë dhe nuk e dëgjon atë çfarë flet.

Sipas tij, nëse kërkohen shkaktarët në këtë proces ata janë vet Isa Mustafa dhe ish-Presidenti Hashim Thaçi.

“Fillimisht unë nuk e dëgjoj atë, sepse shkaktarë për mosliberalizim të vizave, është Isa Mustafa dhe Hashim Thaçi, ata e dinë edhe qytetarët e Kosovës. Isa Mustafa çfarë flet nuk duhet të merret për bazë”, tha ai për Front Online.