Drejtoresha e Arsimit në Prishtinë, Shpresa Shala ka bërë të ditur se shkollat e mesme të ulëta “Abdyl Frashëri” dhe “Gjin Gazuli” në kryeqytet kanë kaluar në sistemin online të mësimit, për shkak të numrit të madh të të infektuarve me koronavirus.
Ajo në një postim në Facebook ka lutur prindërit që të kenë kujdes të shtuar për fëmijët.
“Të nderuar nxënës, prindër, mësimdhënës dhe staf i shkollës, duke e pare rritjen e numrit të rasteve me COVID-19 ditëve të fundit në shkolla, kërkojmë nga ju që masat antiCOVID-19 të respektohen me përpikëri sipas protokollit. Gjithashtu, i lusim prindërit që të kenë kujdes të shtuar për fëmijët e tyre jashtë objektit shkollor (vajtje – ardhje/ shkollë – shtëpi dhe anasjelltas), Rrjedhimisht, nëse fëmijët janë me ndonjë prej simptomave (të njohura tashmë), të izolohen në shtëpi dhe të njoftojnë përfaqësuesit e shkollës përkatëse dhe IKSHPK-në për testim”, ka shkruar Shala.
Ndryshe, gjatë 24 orëve të fundit, në Kosovë me koronavirus kanë rezultuar 793 raste, prej tyre vetëm në Prishtinë 295.
Postimi i plotë pa ndërhyrje:
Për shkak të numrit të infektuarëve me Covid-19, vetëm sot dy shkolla në Komunën e Prishtinës, sipas rekomandimeve te IKSHPK, kanë kaluar në mësimin online (skenari C) SHML “Abdyl Frasheri” dhe SHML “Gjin Gazuli”; situatë e rënduar është edhe në shkollat tjera!
Te nderuar nxënës, prindër, mësimdhënës dhe staf i shkollës, duke e pa rritjen e numrit të rasteve me ‘ Covid-19 ditëve të fundit në shkolla, kërkojmë nga ju që masat ‘Anti-covid-19’ të respektohen me përpikmëri, sipas protokolit.
Gjithashtu, i lusim prindërit që të kenë kujdes të shtuar për fëmijët e tyre jashtë objektit shkollor (vajtje – ardhje/shkollë – shtëpi dhe anasjelltas),
Rrjedhimisht, nëse fëmijët janë me ndonjë prej simptomave (të njohura tashmë), të izolohen në shtepi dhe të njoftojnë përfaqësuesit e shkollës përkatëse dhe IKSHPK-në për testim.
Pra, vetëm me kujdes të shtuar në respektim të masave, mund të mbajmë shkollat hapur.
Sherim të lehtë dhe të shpejtë për të infektuarit dhe KUJDES të shtuar për të gjithë të tjerët në shkollë dhe jashtë saj!/KP