Në një intervistë në RTK, Drejtori i KEK-ut, Nagip Krasniqi, ka thënë se Auditor i Brendshëm i korporatës, e ka monitoruar procesin e rekrutimit të punëtorëve të rinj në konkursin e fundit. Duke tentuar të legjitimonte procesin e rekrutimit, Krasniqi përmendi monitorimin nga Auditimi si një nga hapat që sigurojnë punësim meritokratik. Ani pse, gjatë intervistës ai e pranoi se ka pasur tentim për të ndikuar në punësim e madje tregoi se KEK-u ka pranuar 260 ankesa të personave të pakënaqur me konkursin e fundit.
Ndonëse, Krasniqi po krenohet me faktin se Auditimi ka përcjellë konkursin, duket se as vetë ky departament nuk ka shpëtuar nga ‘fenomeni i punësimit nepotik’ në konkursin e fundit në KEK.
Sepse, siç merr vesh Gazeta Nacionale, shefi i Auditimit, Ismet Vrapqani, ka punësuar djalin e tij në mihjen e thëngjillit (xehetari), pa i plotësuar kushtet, pasi për këtë pozitë është kërkuar kualifikimi i veçantë për xehetari.
Edhe pse e ka të përfunduar vetëm shkollën e mesme, djali i Vrapqanit u punësua në një pozitë në KEK ku kërkohej diplomimi në degën e xehetarisë në shkollën profesionale.
Krasniqi nuk e ka mohuar tendencën e njerëzve të politikës për të ndikuar në konkurs.
Në intervistën në RTK, ai ka thënë se njerëz nga sfera e politikës kanë tentuar të ndikojnë në punësimet në KEK gjatë konkursit të fundit, ndonëse tha se i ka refuzuar të gjitha kërkesat nga ta.
“Kanë qenë njerëz nga sfera të ndryshme të jetës. Biznes, politikë etj. Normalisht që i kam refuzuar. Ndoshta kanë qenë të nisur nga praktikat që kanë ndodhur për 20 vite. I kam udhëzuar edhe anëtarët e komisionit që ta bëjnë”, shtoi ai.
Por, duket se Krasniqi nuk i ka bërë ballë një politikani që vjen nga partia e pushtetit, VV, ku dikur bënte pjesë edhe vetë ai.
Ashtu siç ka raportuar Gazeta Nacionale, deputeti Halil Thaçi nga radhët e Lëvizjes Vetëvendosje, ka punësuar të afërm të tij dhe përkrahës të partisë së tij në Obiliq.
E rreth konkursit të fundit në KEK, Krasniqi ka thënë se janë dorëzuar në total 260 ankesa, pasi që ky konkurs u karakterizua me shumë probleme.
Madje mediat raportuan për punësime familjare e politike.
Krasniqi në RTK ka thënë se janë dorëzuar dorëzuar 260 ankesa për konkursin e fundit.
Sipas Krasniqit, KEK-u do të vazhdoj me procedurat e rregullta deri në vendimin e radhës të Prokurorisë.
“Ne nuk mund te vijmë në një konkluzion pa bërë analizën e ankesave dhe pa pasur ndonjë vendim nga Prokuroria”, ka thënë Krasniqi në RTK.
Nga burimet e saja, Nacionale ka mësuar se njëri nga të punësuarit në KEK nuk e kishte plotësuar fare testimin me shkrim, duke e dorëzuar të njëjtin pa plotësuar asgjë në të.
Megjithatë, sipas Drejtorit të KEK-ut, nuk ka pasur asnjë parregullsi në testin më shkrim.
Por, në lidhje me çështjen e provimit me gojë, ai nuk e ka përjashtuar faktin se ka mund të ketë lëshime, pasi që ky provim i ka përmbysur rezultatet e testimit me shkrim.
“Testi ka qenë korrekt, në testin me shkrim s’ka mundur të ketë ndonjë parregullsi, por rezultatet janë përmbysur në testim më gojë. Nuk ka qenë testim ekselent, por ka qenë i mirë mjaftueshëm”, tha ai në RTK.
Kryeshefi i KEK-ut, Nagip Krasniqi, ka pranuar se është blerë rrymë edhe nga kompania GEN, kompani sllovene që ka zyre edhe në Beograd.
“Ne kemi blerë energji nga tregtarët që janë ofruar. Nuk mund të vendosim se cila do të afrohet. GEN ka bërë disa herë oferta dhe ajo ka pika të ndryshme. Ajo ka fituar disa herë në ankande. Në Tiranë, Beograd etj.. tash nga cila pikë ofrojnë ne nuk mund t’ua diktojmë. Ne blejmë energji nga ato kompani të licencuara në Federatën Evropiane”, tha Krasniqi në RTK.
Krasniqi nuk dëshiroi të komentojë rastin e ambasadorit Martin Berishaj, emri i të cilit u përmend në një skandal financiar në Slloveni.
“Nuk mund të komentoj rastin Berishaj apo ndërlidhjet tjera. Nuk e di dhe nuk është puna jonë ta dimë. Puna jonë është të kryejmë mbulimin me furnizimin të energjisë, e kur ka nevojë importojmë nga komani të licencuara edhe nga ZRRE-ja tek e fundit”, shtoi ai. / Nacionale