DOKUMENTE | Pasi qëndroi kundërligjshëm disa vite, Prindon Sadriu tërhiqet nga të qenit kryetar i një OJQ-je

Prindon Sadriu nga viti 2019 deri para pak kohësh ka qenë Kryetar i Shoqatës së Ushtarakëve Rezervë të Kosovës. Demokracia.com ka raportuar se qëndrimi i tij në këtë pozitë ishte në kundërshtim me legjislacionin e Republikës së Kosovës. Pos kësaj, Zotëria i Parë nuk e kishte deklaruar fare këtë pozitë në Agjencinë për Parandalimin e Korrupsionit.

Pas raportimit që Demokracia.com ka bërë në vitin e kaluar se Prindon Sadriu po qëndronte kundërligjshëm në një pozitë si kryetar, burri i presidentes Vjosa Osmani është tërhequr nga ky post.

Më 27 korrik 2019, Prindon Sadriu bashkë me dy të tjerë, Premtim Rashitin dhe Uran Kurtishin, kanë themeluar Shoqatën e Ushtarakëve Rezervë të Kosovës. Bazuar në regjistrimin e saj në Ministrinë e Punëve të Brendshme dhe Administratës, kryetar aty figuronte Prindon Sadriu.
 

Bashkëshorti i presidentes Osmani nuk e kishte deklaruar këtë pozitë asnjëherë në deklarimin e rregullt vjetor për çka ka qenë i obliguar, pasi që mban post të lartë publik.

Demokracia.com kishte shfletuar deklarimet e pasurisë nga viti 2019 dhe deri më tani të Sadriut, por në asnjërën prej tyre nuk figuronte posti i kryetarit në këtë shoqatë dhe kjo ishte shkelje ligjore.

Redaksia kishte pranuar edhe një interpretim ligjor nga Agjencia për Parandalimin e Korrupsionit (APK) lidhur me mëdyshjet nëse Sadriu ndodhet në konflikt të interesit si zyrtar i lartë shtetëror dhe si kryetar i shoqatës në të njëjtën kohë.

Në përgjigjën e saj, APK-ja konfirmonte për Demokracia.com se një situatë e tillë ishte shkelje ligjore.

“Referuar pyetjeve tuaja të parashtruara në Agjencinë për Parandalimin e Korrupsionit, njoftoheni si në vijim: Sipas Ligjit për Parandalimin e konfliktit të interesit në ushtrimin e funksionit publik (Nr.06/L-011), zyrtarët e lartë mund të jenë pjesë e organizatave jo qeveritare, me përjashtim të funksionit drejtues në to. D.m.th. anëtarësia nuk është e ndaluar, por kufizim për ta janë funksionet drejtuese në to. Ky rregull saktësisht është dhënë në nenin 14, paragrafi 1 dhe atë si vijon: Zyrtari i lartë mund të jetë anëtar i organit drejtues, me përjashtim të funksionit drejtues, të organizatës joqeveritare nga lëmi i shkencës, sportit, arsimit, kulturës, veprimtarive humanitare dhe të ngjashme pa të drejtë shpërblimi me pagesë, përveç të drejtës në kompensimin e shpenzimeve të udhëtimit dhe shpenzimeve të tjera të lidhura me to. Ndërsa, përveç kufizimit për funksionet drejtuese, Organizata jo qeveritare me zyrtarë publik në radhët e saj ka edhe një kufizim tjetër sa i takon përfitimit të fondeve dhe atë si në paragrafin dy të nenit 14, që shprehimisht thotë: 2. Organizata joqeveritare sipas paragrafit 1. të këtij neni nuk ka të drejtë të lidh kontratë ose të përfitojë fonde nga institucioni ku ushtron detyrën zyrtari që është anëtar i organit drejtues në këtë organizatë”, thuhet në përgjigjen e APK-së për Demokracia.com.

Siç shihet në përgjigjen e APK-së, e cila thotë se “Zyrtari i lartë mund të jetë anëtar i organit drejtues, me përjashtim të funksionit drejtues”, atëherë bashkëshorti i presidentes Osmani, Prindon Sadriu, ka vite që ka qëndruar kundërligjshëm si Kryetar i Shoqatës së Ushtarakëve Rezervë të Kosovës.

Nuk dihet nëse Sadriu është detyruar nga Kundërkorrupsioni që të largohet nga ajo pozitë, por në faqen e Agjencisë për Parandalimin e Korrupsionit nuk është nxjerrë asnjë vendim lidhur me Prindon Sadriun, ashtu siç bënë ky institucion kur të hetojë ndonjë zyrtar për konflikt të interesit.

Pas përfundimit të mandatit diplomatik në Maqedoninë e Veriut, Prindon Sadriu tash është emëruar Drejtor i Departamentit për NATO dhe Politika të Sigurisë në Ministrinë e Punëve të Jashtme dhe Diasporës. /Demokracia.com/