Rrjeti i organizatave joqeveritare, “Demokracia në Veprim” (DnV) po vlerësojnë se zgjedhjet e parakohshme të 14 shkurtit janë organizuar në përputhje me standardet demokratike. E vetmja gjë, që i hedh hije këtij procesi në bazë të rezultateve preliminare, sipas Eugen Cakolli nga DnV është numri i madh i votave të iniciativës së Adriana Hoxhiq dhe asaj rome në zonat veriore, ku demografia e komuniteteve boshnjake dhe rome është e vogël.
Ai përmes një konference për medie gjatë ditës sotme tha se ppublikimi i rezultateve preliminare dhe daljes në zgjedhje brenda një periudhe të shkurtër kohore nga KQZ-ja, ka ndikuar në rritjen e transparencës dhe besueshmërisë së publikut në zgjedhje
Cakolli; Zgjedhjet e parakohshme janë organizuar dhe zhvilluar me standardet demokratike
Video:
“ Demokracia në Veprim vlerëson që zgjedhjet e parakohshme parlamentare të 14 shkurtit janë organizuar dhe zhvilluar në përputhje me standardet demokratike për zgjedhje të lira dhe të drejta; Dita e zgjedhjeve, respektivisht procesi i votimit dhe numërimit në përgjithësi është zhvilluar i qetë, i rregullt, dhe pa ndonjë parregullsi serioze që do të mund të ndikonte në integritetin e procesit zgjedhor. Sidoqoftë, dita e zgjedhjeve është shoqëruar me disa parregullsi të izoluara, të cilat janë evidentuar edhe gjatë cikleve të mëparshme zgjedhore. Publikimi i rezultateve preliminare dhe daljes në zgjedhje brenda një periudhe të shkurtër kohore nga KQZ-ja, ka ndikuar në rritjen e transparencës dhe besueshmërisë së publikut në zgjedhje”, u shpreh ai
Cakolli tha se tek subjektet e reja fituese të komuniteteve boshnjake dhe rome vërehet një elektorat i koncentruar dhe numër i pazakontë i votave të fituara në zonat e banuara me shumicë serbe, sidomos në Mitrovicë të Veriut dhe Graçanicë
Cakolli: Humbja e disa subjekteve politike tradicionale nga radhët e komuniteteve jo-shumicë hedh hije dyshimi
Video:
“Ajo çfarë bie në sy si fenomen në këto zgjedhje është, bazuar në rezultatet preliminare, humbja e disa subjekteve politike tradicionale nga radhët e komuniteteve jo-shumicë, sidomos nga radhët e komunitetit boshnjak dhe ai rom hedh një hije dyshimi sa i përket reflektimit të vullnetit qytetarë në mënyrë të drejtë. Tek subjektet e reja fituese, vërehet një elektorat i koncentruar dhe numër i pazakontë i votave të fituara në zonat e banuara me shumicë serbe, sidomos në Mitrovicë të Veriut dhe Graçanicë ku përgjithësisht nuk ka përqendrim të madh demografik të komuniteteve respektive. Dy subjektet politike, iniciativa e zonjës Adriana Hoxhiq dhe iniciativës tjetër rome kanë fituar një numër të konsiderueshëm të votave që është në shpërputhje me koncetrimin demografik në ato zona”, u shpreh Cakolli.
Krahas këtyre, Cakolli tha se puna dhe pavarësia e KQZ-së janë cenuar nga ndërhyrjet nga palët e jashtme, e posaçërisht nga ushtruesja e detyrës së presidentit, Vjosa Osmani përmes deklarimeve të saj publike.
Cakolli: Puna dhe pavarësia e KQZ-së janë cenuar nga ndërhyrjet e palëve të jashtme
Video:
“Janë shënuar përplasje mes anëtarëve të KQZ-së, përkatësisht mes anëtarëve të një subjekti politik dhe Kryetares së KQZ-së. Kjo ka ndikuar që një numër i madh i mbledhjeve të ndërpriten apo të shtyhen. Po ashtu, puna dhe pavarësia e KQZ-së janë cenuar nga ndërhyrjet nga palët e jashtme, posaçërisht nga Ushtruesja e Detyrës së Presidentit përmes deklarimeve të saj publike. Kryetarja e KQZ-së ka qenë target i sulmeve të shumta nga subjektet politike por edhe palë tjera; KQZ-ja, përkundër afateve të shkurtuara, ka arritur t’i përmbyllë pothuajse të gjitha aktivitetet dhe operacionet zgjedhore pa vonesa. Përjashtim bën vetëm operacioni i votimit jashtë vendit, i cili nuk ka arritur të mbyllet në tërësi brenda afatit”, tha ai.
Zgjedhjet e parakohshme në Kosovë u mbajtën të dielën e javës së kaluar, përveç rezultateve preliminare të partive politike, tani ka filluar edhe numërimi i votave të kandidatëve për deputetë. Derisa pritet të kalojnë disa javë në certifikimin e rezultateve zgjedhore./E.Zeqiri /KosovaPress