Ish presidenti, kryeministri, ministri i Jashtëm dhe luftëtari i UÇK-së, Hashim Thaçi, sot e feston – nëse e feston – ditëlindjen e tij të pesëdhjetë e katërt. Emri i tij ka qenë i lidhur me një varg procesesh politike të rëndësishme për Kosovën, por ai e gjen veten sot të akuzuar për krime lufte dhe krime kundër njerëzimit në Gjykatën Speciale në Hagë.
Kjo ditëlindje u urua nga shumë figura të larta publike, me shumicën prej tyre – siç mund të pritej – që janë pjesë e Partisë Demokratike të Kosovës (PDK).
Memli Krasniqi – kryetari aktual i kësaj partie – postoi një fotografi me Thaçin dhe ofroi një mbishkrim të thjeshtë e të shkurtër në Facebook ku shkruhej “Urime ditëlindjen President!”
Përveç figurave të PDK-së, ditëlindja Thaçit iu urua – për çudi – edhe nga figura të Aleancës për Ardhmërinë e Kosovës (AAK).
Pal Lekaj e postoi një fotografi me rezolucione tepër të vogla, ndoshta as 100 me 100, por dha më shumë fjalë për ditëlindjen e ish presidentit.
“Urime ditëlindjen miku im, president Hashim Thaçi! U pafshim së shpejti në Kosovë, me ty dhe shokët e tjerë!”
Përveç tij, edhe Agron Kuçi i partisë së Haradinajt uroi ish oponentin politik. Kuçi është kryetar i komunës së Junikut.
Në anën tjetër, marrëdhëniet e Vetëvendosjes – që tashmë është në pushtet – me Thaçin nuk janë zbutur edhe pas largimit të tij nga skena politike.
Thaçi është akuzuar e vazhdon të akuzohet në vijimësi nga anëtarët e kësaj partie në lidhje me procese të ndryshme politike.
Por, më dashamirës se më herët është treguar Albin Kurti që në disa raste gjatë këtij viti e ka konsideruar padrejtësi paraburgosjen e Thaçit dhe liderëve tjerë të UÇK-së në Hagë.
“Ata bënë luftë të fortë me Serbinë, ne patëm dy mijë dëshmorë. Është e pabesueshme të kesh politikanë të lartë të Kosovës në burg që luftuan për liri” – kishte thënë kryeministri.
Për më tepër, në intervistën në transmetuesin publik (RTK), i pari i Vetëvendosjes kundërshtoi edhe stërzgjatjen e masës së paraburgimit për ish liderët e UÇK-së.
“Unë shumë prej tyre i kam pasur kundërshtarë politikë – nuk e di çka mendojnë ata për mua – por ky paraburgim është i dëmshëm!” – kishte thënë ai.
Po ashtu, kryeministri Kurti kishte kërkuar të dinte se çka mendonin ata(pra, Thaçi me të tjerët) për të. Ndoshta, i ka interesuar të dijë mendimin e Thaçit konkretisht në lidhje me punën e tij.
Disa ditë pas kësaj interviste, ministrja e Drejtësisë, Albulena Haxhiu kishte shkuar në Hagë për të vizituar të paraburgosurit në Hagë por takimin me të nuk e kishin pranuar as Hashim Thaçi e as Kadri Veseli.
TH A Ç I, shkurtimisht
Hashim Thaçi ka lindur më 24 prill të vitit 1968 në fhatin Burojë të komunës së Skënderajt. Ai kishte qenë një ndër liderët e Ushtrisë Çlirimtare të Kosovës gjatë luftës, ndërkohë që pas luftës kishte udhëhequr për mbi gjashtëmbëdhjetë vjet Partinë Demokratike të Kosovës (PDK).
Në mbamendjen popullore, 54 vjeçari do të qëndrojë sidomos për shpalljen e Pavarësisë së Kosovës më 17 shkurt të vitit 2008.
Gjatë periudhës së tij si president, ai kishte kryer vizita në 23 shtete të ndryshme botërore, prej të cilave kishte qenë katër herë në Shtetet e Bashkuara të Amerikës.
Thaçi ndodhet në paraburgim në Hagë që nga 10 nëntori i vitit 2020./Nacionale