Prokuroria Themelore në Prishtinë ka nisur hetimet për një rast që lidhet me veprën penale “hyrje në sistemet kompjuterike”, pas denoncimit të një 33-vjeçari nga Fushë Kosovë i cili ka raportuar se dikush ia ka hakuar fjalëkalimin e tij në një llogari ku mban kriptovaluta dhe janë kryer transaksione të ndryshme.
Burimet nga Prokuroria kanë bërë me dije për Sinjalin se vlera e mjeteve që kanë kaluar nëpër disa kuleta virtuale është rreth 40 mijë euro. Viktima ka deklaruar se paratë janë marrë nga ‘Metamask’, me ç’rast dyshohet se kundërligjshëm i janë vjedhur paratë dixhitale.
Ai ka deklaruar para hetuesve policorë së nuk ka dyshime te ndonjë person i caktuar që mund t’i ketë kryer këto transaksione.
Si rezultat i denoncimit, Krimet Kibernetike kanë nisur hetimet dhe me urdhër të Prokurorit të Shtetit është iniciuar rasti si “hyrje në sistemet kompjuterike”.