Mungesa e hetimeve që çojnë në zgjidhjen e rasteve të dhunës, dënimet e ulëta nga Gjykatat, si dhe mosreagimi i duhur nga ana e Policisë, shpesh janë vlerësuar si disa nga faktorët që po ndikojnë në rritjen e numrit të rasteve të dhunës në familje. Gratë, si viktimat më të shpeshta frikësohen t’i denoncojnë bashkëshortët, çka i shtynë ata që ta përsërisin veprën e njëjtë, raporton Gazeta Sinjali.
Për një rast të tillë ka rrëfyer në Polici një grua nga Vushtrria, e cila e denoncoi bashkëshortin për dhunën në familje që pretendon se e ka ushtruar që 24 vite martesë.
Ajo ka deklaruar para hetuesve policorë se gjithë këto vite, prej kur është martuar me të dyshuarin, ai ka shkaktuar dhunë fizike e psikike, jo vetëm ndaj saj, por edhe ndaj fëmijëve, në praninë e të cilëve shpesh edhe e ka keqtrajtuar e dëbuar nga shtëpia.
Në dëshminë e saj të dhënë në Polici thuhet se bashkëshorti i saj ka ushtruar dhunë ndaj saj dhe fëmijëve të tyre, në mënyrë sistematike, duke iu shkaktuar edhe trauma si pasojë e veprimeve brutale.
Para hetuesve policorë ajo ka zbuluar edhe një rast që i ka ndodhur vitin e kaluar, kur ajo kishte vendosur të punojë në kompani të vëllait. Sipas saj, përveç që nuk e kishte lejuar të punojë, burri i saj edhe e ka rrahur mizorisht.
Krejt çka ka përjetuar këto vite, ajo ka thënë se i ka ndikuar në gjendjen e saj shëndetësore, që është rënduar për shkak të dhunës e trajtimit çnjerëzor. Ky rast dhe shumë ngjarje të tilla të trishta që kanë ndodhur në familjen e saj, e kanë bërë më në fund që të mos heshtë dhe ta denoncojë rastin, ku ka kërkuar edhe urdhër mbrojtës.
Raportimi i viktimës të dhunës në familje e bëri Policinë të aktivizohet, me ç’rast kanë nisur kërkimet ndaj të dyshuarit, por i njëjti ende nuk është kapur.
Me urdhër të Prokurorit të Shtetit, ndaj tij kanë nisur hetimet për “dhunë në familje”.