Numri i rasteve të dhunës në familje në vendin tonë është në rritje çdo ditë e më shumë. Çdo ditë persona të ndryshëm që përjetojnë dhunë nga familjarët e tyre, kërkojnë ndihmën e Policisë për të marrë mbrojtje dhe për të zgjidhur problemet, raporton Gazeta Sinjali.
E një rast i tillë ka ndodhur dje edhe në fshatin Treboviq të Pejës, ku kryefamiljari dyshohet se ka sulmuar fizikisht bashkëshorten e tij dhe djalin 19-vjeçar.
Sinjali mëson se rastin e kanë denoncuar viktimat, të cilët kanë deklaruar se burri, respektivisht babai, ushtron dhunë psikike e fizike ndaj tyre.
Njësitet policore me të marrë informatën kanë dalë në vendin e ngjarjes ku kanë arrestuar personin e dyshuar, të cilin e kanë shoqëruar në stacion policor për intervistim.
Pas përfundimit të procedurave policore, Prokurori i Shtetit ka urdhëruar që i dyshuari të ndalohet për 48 orë dhe i njëjti të hetohet nën dyshimet për kryerjen e veprës penale ‘Dhunë në familje’.