Zëvendëskryeministri kosovar, njëherësh kryenegociator i palës kosovare në dialog me Serbinë Besnik Bislimi, ka folur pas marrëveshjes për energji me Serbinë. Ai ka thënë se se është vetëm udhërrëfyes për hapat që duhet të ndërmerren deri te normalizimi i çështjes.
“Nuk trajtohen aspak çështjet pronësore. Është vetëm udhërrëfyes për hapat që duhet të ndërmerren deri te normalizimi i çështjes. E kemi publikuar edhe udhërrëfyesin, në asnjë fjalë s’përmendet asnjë aset, sepse udhërrëfim apo pikënisje është legjislacioni i Kosovës që e njeh KEDS-in si monopolist në ofrimin e shërbimit të shpërndarjes në Kosovë”, tha Bislimi.
Numri dy i qeverisë është përgjigjur edhe në pyetjet se pse Lëvizja Vetëvendosje, sa ishte në opozitë, e quante të dëmshme marrëveshjen, për çka dha një përgjigje të çuditshme.
“Marrëveshjen ne nuk e kemi pranuar. Marrëveshja është aty. Problemi ka qenë që marrëveshja kur është nënshkruar ka qenë e keqe dhe e kemi thënë publikisht dhe e kemi kundërshtuar për arsye se në momentin kur e negocion, ke hapësirë për negocim dhe mendojmë se ka qenë marrëveshje e dëmshme, mirëpo implementimi i saj ka qenë edhe më i dëmshëm. Ajo që ne kemi bërë me udhërrërfimin e sotëm është se e kemi kthyer situatën në normalitet, por pa thënë që marrëveshja është e mirë”, tha ai për Rtk.
Por Bislimit i është kundërpërgjigjur ish kryeministri Isa Mustafa i cili nënshkroi të njëjtën marrëveshje në vitin 2015.Mustafa në televizionin publik, përgjigjen e Bislimit e quajti tragjikomedi.
“Situatë tragjikomike, kur e njëjta marrëveshje në vitin 2013 e 2015 të jetë e keqe e sot të jetë e mirë, sepse bazamenti i marrëveshje nëse ka cenuar sovranitetin atëherë e cenon edhe sot”, tha Mustafa.