Nënkryetarja e Partisë Demokratike të Kosovës, Vlora Çitaku, ka thënë se spektri politik në Kosovë duhet të mundohet t’i tejkaloj inatet politike kur flitet për themelimin e Gjykatës Speciale, derisa ka theksuar se ‘’e dimë dhe e mbajmë mend se kush çfarë qëndrimi ka mbajtur atë botë’’.
‘’Sikurse e dimë dhe e mbajmë mend se kush e ka kundërshtuar sinqerisht, kush e ka kundërshtuar rrejshëm, kush e ka miratuar si domosdoshmëri, si dhe kush e ka miratuar me entuziazëm, pa fije presioni’’, ka shkruar Çitaku në Facboook.
‘’Hashim Thaçi, Kadri Veseli, Jakup Krasniqi, Rexhep Selimi dhe shokët e tyre nuk janë në Hagë për shkak të aktivitetit politik. Ata janë atje si prijës të UÇK-së. Duheni me qenë në gjendje me t’i tejkalojmë inatet. Urrejtja nuk është platformë e shëndoshë’’.
‘’Dje Presidentja e sot Ministrja e Drejtësisë janë përkujdesur me na e përkujtu se kush ka bërë presion për themelimin e Gjykatës Speciale. E dimë dhe e mbajmë mend shumë mirë’’.
Por ajo ka shtuar se e ‘’dimë që nuk ka pasur rrugë tjetër pas miratimit të atij raporti monstruoz nga ana e Këshillit të Evropës’’.
Ish-ambasadorja e Kosovës në Shtetet e Bashkuara të Amerikës, ka theksuar se po ashtu se ‘’dimë dhe e mbajmë mend kontekstin ndërkombëtar në atë kohë’’.
Ajo ka shtuar se raporti i Martit dhe aktakuza e ngritur nuk kanë të përbashkët as pikë e as presje.
‘’Sikurse e dimë që shumë prej nesh kishim me i dhanë krejt vitet e karrierës në politikë për një ditë të tyre në UÇK’’.
Këtë të shtune, gjatë një konference për media, ministrja e Drejtësisë, Albulena Haxhiu, ka thënë se Qeveria aktuale Gjykatën Speciale e ka gjetur si fakt të kryer.
‘’Ne Gjykatën Speciale e kemi gjetur si fakt të kryer dhe nuk mund të mbahemi përgjegjës si qeveri për këtë, për këtë përgjegjës mund të mbahen vetëm ata të cilët në atë kohë ua kishin ndrydhur duart deputetëve të Kosovës’’.
Ndërsa të premten, ushtruesi i detyrës së kryetarit të Organizatës së Veteranëve të Ushtrisë Çlirimtare të Kosovës, Faton Klinaku, ka reaguar pas deklaratës së presidentes së Kosovës, Vjosa Osmanit, për themelimin e Gjykatës Speciale.
Osmani theksoi se të gjithë e dinë se kush ka bërë presion që Specialja të themelohej, duke aluduar kështu tek ish-presidenti Hashim Thaçi.
Por, për Klinakun, deklarata e Osmanit është absurde.
‘’Kur e them unë për Hashim Thaçin dhe Gjykatën Speciale atë që e tha presidentja sot, është e arsyeshme, por kur e thotë presidentja është absurde’’, ka shkruar Klinaku në Facbook.
/Albanianpost.com