Rritja e rasteve të dhunës në familje në Kosovë është bërë mjaft shqetësuese. Në të shumtën e këtyre rasteve viktima janë gratë, që përjetojnë dhunë qoftë nga bashkëshortët e tyre apo edhe familjarë të tjerë. Kështu ka ndodhur edhe dje në një familje në lagjen Mati 1 në Prishtinë, raporton Gazeta Sinjali.
Sinjali mëson se rastin e ka denoncuar një 27-vjeçare e cila ka deklaruar se bashkëshorti i saj e ka sulmuar fizikisht duke e goditur me grushte.
Si pasojë e dhunës së përjetuar, gruaja ka marrë lëndime trupore, për çka ka kërkuar ndihmë mjekësore në spital.
Ndërkohë njësitet policore janë vënë në lëvizje dhe kanë arrestuar 31-vjeçarin, i cili është shoqëruar në stacion për intervistim.
Me urdhër të prokurorit, ndaj tij është iniciuar rasti ‘Dhunë në famije’ dhe i njëjti është dërguar në mbajtje për 48 orë.