Presidentja e Republikës së Kosovës Vjosa Osmani, në pajtim me kompetencat kushtetuese dhe ligjore, ka emëruar sot anëtarin e ri të Komisionit Qendror të Zgjedhjeve, Alban Krasniqi.
Krasniqi është emëruar konform propozimit të grupit parlamentar të Lëvizjes Vetëvendosje dhe sipas legjislacionit në fuqi, do të shërbejë për kohëzgjatjen e mandatit të mbetur.
“Në ceremoninë e betimit para Presidentes, anëtari i ri i KQZ-së deklaroi se do t`i kryej detyrat e tij në mënyrë të ndershme, besnike, të paanshme, profesionale dhe të ndërgjegjshme”, thuhet në njoftim.
Emërimi i Krasniqit në këtë pozitë është bërë për të zëvendësuar Alim Ramën, i cili është dorëhequr më 13 janar të këtij viti.
Ndryshe, Krasniqi është bashkëshorti i ministres të Drejtësisë, Albulena Haxhiu.
Krasniqi në zgjedhjet e fundit kishte kandiduar për kryetar të Komunës së Malishevës zgjedhje këto që i kishte humbur.
Po ashtu, Krasniqi ka qenë anëtar i KQZ-së edhe në vitin 2011-të ku ishte emëruar nga presidentja Atifete Jahjaga.