Kryeministrja serbe Ana Brnabic i ka reaguar Presidentes së Kosovës, Vjosa Osmani-Sadriu, pas intervistës në CNN të cilat ajo i vlerësoi si të pavërteta dhe destabilizuese, transmeton Gazeta Metro.
Sipas Brnabic presidentja Osmani në intervistën për CNN ka thënë disa të pavërteta për Serbinë, e njëra ishte kur e vlerësoi se Serbia i sheh shtetet e Ballkanit Perëndimor si ‘shtete të përkohshme”.
Brnabic shkroi në konton e saj në Twitter se propaganda dhe dezinformatat e presidentes Vjosa Osmani-Sadriu në CNN vazhdojnë destabilizimin e gjithë Ballkanit Perëndimor.
“Porositë e papërgjegjshme që ka dërguar, në këto kohë kaq delikate për rajonin dhe botën, askujt nuk i ndihmojnë” ka shkruar Brnabic.
Ajo shtoi tutje se këto porosi po vijnë edhe nga dikush që serbëve po iu shkel të drejtat themelore, përfshi të drejtën për votim në zgjedhjet e fundit, dhe e quajti qeverinë e Kosovës “kampion evropian në kërcënimin e trashëgimisë kulturore serbe”.
Brnabic më tej lëvdoi shefin e saj Aleksandar Vucic, që është obligim tashmë në deklaratat e zyrtarëve serbë, se ai nisi Ballkanin e Hapur që të përafronte rajonin, e kishte ftuar kryeministrin shqiptar në një vizitë të parë pas 68 vitesh, dhe e mbështeti rajonin gjatë pandemisë. Pastaj porositi se “Prishtina duhet të ndaloj propagandën dhe të përqendrohet” sipas saj./gazetametro.net