Zëvendëskryeministri i Kosovës, Besnik Bislimi ka reaguar pas demantimit që iu bë nga zëvendëssekretari i përgjithshëm i Këshillit të Evropës, Bjorn Berge.
Bislimi përmes një cicërime në Twitter tha se i vjen keq që nuk ka përdorur termat adekuat, ku në vend të fjalës ‘ai mirëpriti’ është dashur të përdoret ‘ne informuam’.
“Me të vërtetë falënderues për @DSGBjornBerge për takimin e shkëlqyer dhe shkëmbimin e mendimeve. Me të vërtetë më vjen keq për zgjedhjen e termit joadekuat në tweet-in tim të fundit. Në vend të fjalës “ai mirëpriti”, përshkrimi i saktë duhet të thotë “ne informuam”, shkroi Bislimi.
E zëvendëssekretari i Këshillit të Evropës, Bjorn Berge, iu është përgjigjur sërish zëvendës kryeministrit Besnik Bislimi, pasi ky i fundit u sqarua për deklaratën ku thuhej se Berge mbështeti iniciativën për anëtarësimin e Kosovës në Këshillin Evropian, duke thënë se në vend të “e mbështeti”, duhej të ishte “ne e informuam”.
“Faleminderit për këtë sqarim të rëndësishëm Besnik Bislimi. E vlerësoj shumë. Dhe faleminderit për një takim shumë të mirë dhe shkëmbim mendimesh dje”, shkroi Berge mbi cicërimën e Bislimit.
Rreth këtij gabimi të Bislimit kanë reaguar partitë opozitare PDK e LDK
Ish-ambasadorja e Kosovës në Washington, Vlora Çitaku, ka reaguar në Twitter duke thënë se deklarata e Bislimit ka dëmtuar rëndë agjendën e Kosovës.
“Me një tweet, zëvendëskryeministri Bislimi dëmtoi rëndë një agjendë jashtëzakonisht të rëndësishme për Kosovën”, tha ajo.
Sipas Çitakut, ky veprim është mungesës e profesionalizmit, dhe përpos që është skandal, është edhe e dëmshme për Kosovën.
“Mungesë totale e profesionalizmit. Ky nuk është vetëm skandal. Kjo është e rrezikshme dhe e dëmshme”, tha Çitaku.
Ndërkaq, LDK shkon edhe më tutje duke kërkuar dorëheqjen e Bislimit pas skandalit me zyrtarin e KE-së
Zëdhënësja e LDK-së, Sibel Halimi, ka thënë në një konferencë të jashtëzakonshme për medie, se ky skandal e dëmton Kosovën pikërisht në kohën kur po tentohet që vendi ynë të anëtarësohet në Këshillin e Evropës.
“Marrë parasysh që qeveria vjen nga një pushtet që prodhon skandale të vazhdueshme, mundohemi të trajtojmë me urgjencë skandalin diplomatik të zv.kryeministrit Besnik Bislimit në takim me zv.sekretarin e përgjithshëm Këshillit të Evropës, Bjorn Berge. Me që rast ky i fundit e demantoi atë që Bislimi e kishte shkruar pas takimi. Për më keq kjo ndodhi në kohën kur Kosova me të drejt kërkon përshpejtimin për anëtarësimin e saj në NATO, BE, Këshill të Evropës. Bislimi demantohet rëndë nda Beng i cili thotë se ajo çfarë kanë biseduar më Bislimin nuk është e saktë nga ajo çfarë ai ka paraqitur. Ky është një skandal i madh diplomatik që i kushton dhe po i kushton rëndë vendit tonë”, tha Halimi.