Zëvendëskryeministri i Parë i Kosovës, Besnik Bislimi, nuk është shprehur i shqetësuar për largimin e mjekëve nga Kosova.
Gjatë raportimit në Komisionin parlamentar për Integrime Evropiane, kur është pyetur nga deputetët për këtë çështja, ai ka thënë se mjekët largohen edhe prej Gjermanisë dhe vendeve tjera evropiane.
Madje, ai ka treguar se pse ndodh largimi i mjekëve edhe nga vendet e BE-së.
“Po kanë ik mjekët prej Kosovës, kanë ik mjekët gjithmonë. Por, a e dini pse shkojnë mjekët në Gjermani? Jo pse është rritur popullsia e Gjermanisë, po se mjekët gjermanë ikin prej Gjermanisë. Do të thotë edhe prej Gjermanisë ikin mjekët dhe pastaj shtrohet nevoja që me ardhë mjekë nga Ukraina, Kosova, Italia, Polonia. Mobiliteti është vlerë e BE-së. Politikat kryesore të BE-së janë me rritë mobilitetin e fuqisë punëtorë ”, ka thënë Bislimi.
Ai ka deklaruar se as miratimi i Projektligjit për Paga nuk do ta rregullojë çështjen e ikjes se mjekëve nga Kosova.
“Projektligji i ri nuk ka me bë pagën 6000 euro të mjekëve, që me thënë tash që nuk keni nevojë me shku”, është përgjigjur Bislimi në pyetjen e deputetes së AAK-së, Time Kadrijaj.
Kjo e fundit ka thënë se me miratimin e Projektligji për Paga, të cilin qeveria ka premtuar se do ta miratojë në muajin e kaluar, mjekët do të merrnin paga më të dinjiteteshme.
Kadrijaj ka bërë me dije se një pagë më e dinjitetshme, do të mund të ndikonte në mos largimin e mjekëve nga Kosova.
Ditë me parë, gazeta Nacionale ka raportuar për këtë çështje, duke vlerësuar se Kosova në dhjetë vitet e ardhshme rrezikon të mbetet pa mjekë e infermierë.
Gazeta ka treguar se vetëm për 28 ditë të këtij viti, vendeve evropiane ia mësynë 45 mjekë. Përderisa në tri vitet e fundit kosovarët janë braktisur nga plot 538 mantelbardhë.
Alarmit për një gjë të tillë vazhdon t’i mëshojë Oda dhe Sindikata e Mjekëve.
Gazeta Nacionale ka provuar të kuptojë perspektivën e mjekëve që po ikin përmes rrëfimit të një mjekeje të re.
Për gazetën Nacionale, Eneida ka rrëfyer se si ishte detyruar ta lëshonte Kosovën për një vend pune.
“Pas shumë vështirësive ndoqa ëndrrën time dhe fillova të shkollohesha në këtë fushë. Pas përfundimit të studimeve universitare mendoja që do më hapeshin dyert e suksesit dhe do ta vishja mantelin e bardhë, por ja që nuk rezultoi kështu”, ka thënë ajo.
Sipas të dhënave të Odës së Mjekëve të Kosovës, në 28 ditët e fundit nga vendi u larguan 45 mjekë profesionistë. “Natyrisht që është shqetësuese e alarmuese situata. Ne e kemi rastin ku për 28 ditë nga Kosova janë larguar 45 mjekë. Nuk është vetëm motivimi arsyeja, janë edhe kushtet e punës, kushtet e shkollimit. Unë mund t’ju them se në Klinikën e Ortopedisë, aty ku unë punoj, 4 nga 12 ortopedët më të mirë kanë lënë vendin për një punë në shtetet evropiane”, thotë Pleurat Sjediu nga Oda e Mjekëve Kosovarë.
Sipas të dhënave, paga bruto (e pataksuar) e mjekëve në Kosovë është 610 euro, derisa shembull në Gjermani, ata paguhen deri në 4000 euro.
Ndryshe, sipas odave të profesionistëve shëndetësorë, në Kosovë ka 24 mijë e 92 punonjës shëndetësorë të licensuar dhe prej tyre 14 mijë e 966 janë gra dhe 9 mijë e 126 burra./Nacionale